Shillong, Nailar 26: U Myntri ka Tnad Revenue and Disaster u Bah Lahkmen Rymbui hynne ka sngi Balang, ula ong ba ka Sorkar Pdeng kala pyllait ia ka T.17.85 Klur na ka bynta artylli ki Disaster Mitigation Projects ha Meghalaya bad la donkam ia ka Supplementary Demands ban pynbiang ia ka mang tyngka na ka bynta ban ioh pyndonkam.
Haba jubab ia ka Cut Motion halor ka Disaster Mitigation Fund and Preparedness, u Bah Rymbui ula ong, ba ka sorkar kala pan ia ka bor da ka jingbhah tyngka hadien ba ia katei ka pisa la pyllait da ka Sorkar Pdeng.
“Ka Supplementary Demand kaba mynta kaba iadei bad ki projek kiba kyrshan da ka NDMF kam dei ka jingkyrpad kaba thymmai ban bhah tyngka. Kine ki projek kidei kiba lah dep ban ai jingmynjur bad ka jingkyrshan ka Sorkar Pdeng kadei kaba lah dep ban pyllait” ula ong.
Haba batai ia ka rukom treikam, ula ong, “Ka Mitigation ka iapher na ka jingai lypa ia ki lad jingiarap haba don kino kino ki jingwna lynshop ka bor mariang. Ka jingai jingiarap mardor ne Relief kadei kaba la leh mardor ia kino kino ki jingjia, katba ka Mitigation kadei ka jingshim ia ki sienjam ban pynduna ia ka jingshah ktah ne jingma na kino kino ki jingjia jong ki jingwan lynshop ha ki por kiban wan.
“Hapoh jong ka 16th Finance Commission, ka Meghalaya kan ioh T.97 Klur hapoh jongka State Disaster Mitigation Fund (SDMF) naduh u 2026-27 haduh 2030-31, ha kaba 90% na ka Sorkar Pdeng bad 10% na ka bhah jong ki Jylla kiba hap hapoh ki Himalayan States” ula ong.
Na ka T.17.85 Klur kaba la pyllait da ka Department of Expenditure, T.12.27 Klur kadei na ka bynta ka Mitigation Scheme for Forest Fire Risk Management (MSFFRM) bad T.5.58 Klur na ka bynta ka Mitigation Project on Lightning Safety (MPLS).
U Bah Rymbui ula ong, ba ka MSFFRM, kaba la tyrwa da ka Tnad Forest yn pyntreikam ha ki 4 tylli ki district kiba kynthup ia ka West Khasi Hills, South-West Khasi Hills, Ri-Bhoi bad East Garo Hills.
“Ka jingthmu ka long ban pynkhlain ia ka jingiada ba ki khlaw kin lait na ka jingpluh, ka jingmaham kloi, ka jingkhmih bniah ia ka jingma, ka jingpynkhreh lypa bad ban pynduna ia ka jingshah ktah ia ka sawdong sawkun jong ka mariang, ki jingthung jingtep bad ki shnong ki thaw kiba shaniah ha ki khlaw ki btap” ula ong.
Ka jinglut jingsep jong ka projek baroh kawei ka long T.15.82 Klur kynthup ia ka bhah ka Jylla kaba T.1.23 Klur bad T.2.32 Klur na ka bynta ka Preparedness and Capacity Building hapoh jong ka SDRF.
Ka MPLS project, yn pyntreikam da ka MSDMA, ka wan hadien ba la ithuh ia ka jingpom pyrthat ne Lightning kum ka State Disaster. Ka jinglut baroh ka long T.6.74 Klur.
“Kane ka projek kan ialeh ban pynbha ia ka jinglah ki shnong ban ioh pdiang ia ki jingmaham kiba biang por bad ban shim ia ki lad jingiada” ong u Bah Rymbui.
Ula bynrap ba ka Additional Supplementary Demands kaba T. 2.39 Klur na ka bhah ka Jylla, T.22 Klur ia ka SDMF Project kum ka jingshna ia ki kynroh, nala, ki Station ban batai lypa ia ki jingshlei um bad Flood-Plain Zoning Studies bad ka T.4.32 Klur ban pynkhreh lypa bad ka jingai jinghikai pyntbit ruh kadei kaba la dep ban ai ia ka jingtyrwa.
