Shillong, Nailar 26: U Myntri Rangbah ka Jylla u Conrad K Sangma ula ong ba ula pan ia ka jingkyrshan na ka Sorkar Pdeng ban kyntiew ia ka bhah jong ka Jylla Meghalaya ha kaba iadei bad ki Externally Aided Projects (EAP), na ka bynta ka National Games bad na ka bynta ki kam ka NEIGRIHMS ha ka jingleit jongu dang shen sha New Delhi.
Haba iakren hadien ba la wai ka jingialang jong ka kynhun myntri hynne ka sngi Balang, u Sangma ula ong ba ula iakynduh ia u Myntri ka Sorkar Pdeng uba khmih ia ka DoNER u Jyotiraditya Scindia bad pynsngew halor kitei ki artylli ki mat.
“Ha kaba iadei bad ki externally aided projects, nga lah pan ia ka jingkyrshan bad ka jingiatreilang bad ka Finance Ministry ban pynkiew ia ka bhah na ka bynta ki jylla ka thain shatei lammihngi ka ri. Ka Meghalaya kadei kawei na ki jylla kaba la lah ban pyntreikam bha bad 90 percent na ka ram kadei kaba la siew pyndep da ka Sorkar India. Ka bhah ka jong ngi kala iaineh beit T.5,000 Klur naduh ka por jong ka Finance Commission kaba lah dep. Ngi lah kyrpad T.15,000 Klur bad kyrpad ba dei ban kyntiew ruh arshah sha ka T.10,000 Klur,” ula ong.
Ka mat ka baar, ka long ban kyrshan ia ka National Games.
“Ngi lah kyrpad ia ka DoNER Ministry ban kyrshan ia ngi da ka pisa bad ia ki jingshna ia ki jingtei. Watla ka Meghalaya kan pynlong ia katei ka jingiakob ialehkai, man la ki jylla jong ka thain shatei lammihngi ruh kin pynlong ia kawei na ki jingialehkai. Na ka bynta ka mynsiem jong ka thain shatei lammihngi, ka jingpan jingkyrshan na ka DoNER ka long kaba iahap bha. Ula ong ba un sa khmih bniah bad ngin sa ai ia ki jingbatai kiba bniah hadien jong ka dorbar” ong u Sangma.
Ha ka jingiakynduh ka jongu bad u Myntri ka Sorkar Pdeng uba khmih ia ka Koit ka Khiah u JP Nadda, u Conrad Sangma ula ong, “Nga lah iengskhem ha ka jingkyrpad ka jong ngi ban ithuh noh ia ka NEIGRIHMS kum ka Institute of National Importance. U Myntri ula pdiang bad ka ong, ba kadei kaei kaei kaba ka NEIGRIHMS kadei ban don. Nga kyrmen skhem ba kane kan sa iaid beit”.
Ula ong, ba ula iakren ruh ha kaba iadei bad ka jingpynrungkam ha NEIGRIHMS.
“U Myntri ula don lypa ia ka jingtip halor katei ka mat bad ula ong ba ngi donkam ban wad ia ki lad ki lynti ban kyntiew bad ban iarap ia ki samla trai jylla ban kin ioh bha ia ka lad bad ki kabu ban iohkam iohjam” la bynrap u Sangma.
, na ka bynta ka National Games bad na ka bynta ki kam ka NEIGRIHMS ha ka jingleit jongu dang shen sha New Delhi.){kind=link}