Shillong, Nailar 26: Ka eriong bad erngit mynta yn khein noh kum ka State ne Local Disaster ha Meghalaya.
Ia kane ka rai la shim ha ka jingialang jong ka kynhun myntri kaba la long ha ka sngi Balang.
U Myntri Rangbah ka Jylla u Conrad K Sangma ula ong ba kane ka jingwanrah ia ka jingpynkylla ne Amendment kadei kaba la leh da ka Tnad Disaster Management ban weng ia ka jingsngewthuh bakla ha kaban pynbna ia ki jingjulor kiba la mih na ka jingjur ka eriong erngit.
“Kham hashwa, ia u Cyclone la ithuh kum ka State Disaster hynrei ngi lah sakhi ia ka jingkiew jong ki julor kiba la leh da ka eriong ki bym dei pat kiba khlain bor kum u Cyclone. Kane kala wanrah ia ka jingsngewthuh bakla ia ki ophisar ban pynbna ba udei u Cyclone, watla ka hap hapoh ka kyrdan jong ka jingjur jong ka lyer hynrei kam lah pat ban pynjulor.
Ban wanrah ia ka jingshai, ngi lah kynthup ia ka eriong bad ia ka lyer kaba khlain bor ha katei ka thup” ong u Sangma, hadien ba la wai ka jingialang jong ka kynhun myntri.
