Pynsangeh lut ia baroh ki kam ka Shree Cement haduh da dep tohkit
Shillong, Nailar 26 : U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar kan sa thung ia ka Fact Finding Committee ka ban tohkit halor ki jingujor bad ki jingjia kiba mih ha ka public hearing ka Shree Cement, haba rai ban pynsangeh shuwa ia baroh ki kam jong kane ka kompani dewbilat tad haduh ban da dep ka jingtohkit.
U Conrad ula pyntip ia kane hadien ka jingialang bad ki nongialam ka Khasi Students’ Union (KSU) ba iakren halor ki san tylli ki mat jingdawa ka seng, kaba la long hadien jong ka jingiakhih bad ka jingmih ki kam thombor ha ka 19 tarik Nailar.
Ki Symbud Myntri Rangbah ka Jylla lem bad ki heh Ophisar kila iadonlang ha kane ka jingialang.
Yn tohkit ia ka public hearing ka Shree Cement :
“Ka KSU ka dawa ba ia ka public hearing jong ka Shree Cement dei ban khein iap noh. Ngi la pyntip sha ki ba ka Sorkar ka hap ban wanrah ia ka jingkynshew kam ki riew shimet na ka bynta ka jingkiew ka ioh ka kot. Ka Shree Cement ka dei ka kompani ba wan ba-ar ha ka jinglah pynmih mar hapoh ka Ri bad kaba la paw bha” ong u Conrad.
U iathuh ba ka KSU kala kynnoh ba bun ki briew kila shah khang lynti ban leit iashimbynta ha ka public hearing, ka don ka jingiaid lait ia ki kyndon ban iada ia ka mariang bad kam shym la don satia ka jingiasyllok bad ki kynhun bapher bapher.
“Ngin sab uh ia ka Fact Finding Committee ba laitluid ka ban khlieh da ki Heh Ophisar jong ka bor district. Tad haduh ba kan da pyndep ia ka kam, ki kam baroh kin sangeh lut bad ym dei ban pyniaid ia kano kano ka kam” ula ong.
MRSSA registration lyngba ka mobile app:
Halor ka MRSSA 2016, u Conrad ula pyntip ba ka jingpynrung kyrteng ia ki briew ba nabar kiba sahwai kala nang kiew bad bun ki Shnong kila pyntreikam ia ka, hynrei ka jingpyniar ia ka kam ka suki bha namar ki jingbym lah pynbiang ia ki tiar ki tar kiba donkam.
“Ngi don palat 6500 jan kot 7000 tylli ki Shnong ha Jylla. Ban ai computer, ki data entry operator ha man ki jaka ka dei ka kam kaba heh bha” ula ong haba pyntip ba ka Sorkar kala shna mynta ia ka mobile app ban leh da ka face recognition ka ban pynsuk ia kane ka kam.
“Kan long kaba suk bha ia ki Rangbah Shnong lada lah ban pyndonkam ia ka ha kano kano ka mobile ban scan ia ka dur, ki kot ki sla bad thep hapoh ka central database. Kan iarap ban pynbun ia ka jingpynrung kyrteng” ula ong.
Facilitation centres:
U Conrad ula kubur ba ka don ka jingpynsngewthuh bakla halor ka Umling Centre ban khot ne pynkylla sah ka Food Court.
“Kan don ka food court hynrei ka bynta ba nyngkong kan dei ka facilitation centre. Mynshuwa ka don 300 sqft, mynta kan long 100 sqft da ka jingpynheh sa 2000 sqft” ula ong haba bynrap ba yn sa pynlong ia ka jingiajurip lang bad ki nongialam ka KSU ia kane ka jaka.
U ong ba ka jingtei ka dei ban dep hapoh 2-3 bnai bad ka Umling Centre ka dei ban treikam noh hashuwa ka Khristmas. Ka jaka na ka bynta ka Ratacherra bad Athiabari ka dei ka ban dang thied.
Migrant Workers Act:
Halor ka Meghalaya Identification, Registration, Safety and Security of Migrant Workers Act 2020, u Conrad ula ong ba ka rule ba hashuwa ka duna ia ka jingshai ka ban batai kiei ki Ophisar kiba lah ban talasi bad ruh halor ka jingpynshisha ki Pulit.
“Ngi la pynshai ba ki don artylli ki lynti ban pynshai – SP jong ka district ba ki wan lane lynba ka CCTNS network. Hadien ka jinghikai ba shibnai, ka jingpyntreikam kan sa sdang noh” ula ong.
NEIGRIHMS bad jingthungkam :
Halor ka NEIGRIHMS, ula ong ba ka dei ka Institution ba laitluid hynrei ka Sorkar kan sa pynbeit ia ka jingialang jong ka KSU bad u Myntri ka Koit ka Khiah ka Sorkar Pdeng bad tyrwa ruh ia ki ban iarap ia ki jingdonkam na ka bynta ka eksam.
Halor ka jingpynkylla ia ka thungkam thungjam, ula ong ‘Ia ka interview jong ka kam Group-D lah dep ban pynduh bad ia ka kam Group-C non technical, ia ka interview lah pynduh noh naduh u Kyllalyngkot 2027. La dep mynjur ruh ia ka SOP na ka bynta ki District Selection Committee (DSC).
“Halor ki 23 tylli ki mat jingpynkylla bala ai jingmut na ka bynta ka MPSC,. 19 tylli lah pyntreikam mynta” ula ong haba bynrap ba ka jingdawa ban buh bhah ia ka kam MPSC tang na ka bynta ki trai shnong yn sa shong bishar da u Symbud Myntri Rangbah Bah Prestone Tynsong ha ka taiew ban wan ban wad ia ka lynti kaba lah ban leh kat kum ka ain.
U CM ula ong ba ka KSU kala ai haduh 20 tylli ki mat baroh lang bad 5 tylli la iakren ha ka sngi Balang, bad ka jingiakren kan sa nang bteng halor ki mat kiba sah.
