Shillong, Nailar 25 : U MLA ka NPP na Rongara Siju bad Myntri barim Rakkam A Sangma ula phah tuklar ha u Myntri Rangbah Conrad K Sangma ban iakren lem bad ka Ministry of Road Transport and Highway (MoRTH) halor ka jingpynslem ban pyntrei ia ka National Highway 217 na Darugre sha Dalu lyngba ka Baghmara.
Ha ka shithi sha u Myntri Rangbah, u Rakkam ula ong ba kat kum ki tyllong khubor na ka NHIDCL, ka kompani ba pyntrei, u Secretary, MoRTH ula bthah ban sorjamin biang ia ka jingthied jaka bad pynkylla biang ia ka DPR na Darugre sha Dalu lyngba ka Baghmara.
Ula kdew ba ki kam ba iadei bad ka thied jaka kala dep bad la aiti ban ioh jingmynjur bad ban siew ia ka bailutksan sha u Deputy Commissioner, South Garo Hills.
“Naba ki kam thied jaka ki dei kiba la pyndep bad ka jingkylli ban pynwandur thymmai kam mih shuh, hynrei ia kane kajuh dei ban ai jingmynjurnoh kham kloi bad ia ka jingeh jongka surok ruh ym dei ban pynduna bad kane ka juh ka kam ka dei ruh ban long ia ka bynta jong ka surok Dainadubi sha Darugre NH-217 ” ong u Rakkam.
Une u MLA ula ong ba ka jingleh u Secretary kan nang pynslem shuh shuh ia kane ka project kaba la slem lypa, katba ki paidbah ki dang mad ia ka jingjynjar ha ka leit ka wan namar ka jingsniew jong ka surok NH-217.
