Shillong, Nailar 26 : Ka Meghalaya ka don ia ka hok ban ong ‘Em’ ia ka jingtih uranium haba ki jingma ia ka mariang bad ia ki briew ka long kaba jur bha, ong ka MLA ka Gambegre bad kurim u Myntri Rangbah ka Jylla, Mehtab Chandee A Sangma ha ka sngi Balang.
“U Uranium mynta u dei u mar ba kongsan na ka bynta ka Ri, hynrei ka Meghalaya ka don iala ka jong ka hok ban ong ‘Em’ ia ki katto katne ki jingdon jingem bad ki dei ban iai neh ia ka jinglong bym pat don ba ktah, khamtam haba ki jingma ia ka mariang jong ngi, ki Shnong ki Thaw bad ki pateng ban wan ka long kaba jur bha” ong u Mehtab haba kyrshan ia ka resolution ka Sorkar jylla pyrshah ia ka jingtih uranium bala wanrah da u Myntri Rangbah ha Iingdorbar Thaw Ain.
Ula ong ba ka roi ka par ka dei ban pynthikna pat ia ka jingiada ia ka jingkhlain ba kongsan eh ka Jylla.
“Ka roi ka par ka dei ban pynthikna ba kan iada ia ki briew jong ngi, ia ki wah jong ngi, ia ki khlaw jong ngi bad kham kongsan eh, ia ka khyndew jong ngi”kala ong.
Kane ka MLA ka NPP, kala pynpaw ba ka kyrshan tylli naduh ka mynsiem ia kane ka resolution.
“Nga kmen ba kane ka Iingdorbar Thaw Ain kala shim da kawei ka sur ia ka rai ban mynjur ia kane ka resolution” kala bynrap.
