Shillong, Nailar 26 : Kawei ka Bolero Pickup ba shim wai da ka kompani Shree Cement Ltd, kala shah wiang ding ha ka kynhun ki runar tap khmat ha ka Lad Jarain, Elaka Sutnga, East Jaintia Hills.
Kane ka jingjia kala jia ha ka miet 25 tarik Nailar bad la iathuh ba ki runar kila kawang da ki petrol bomb ia kane ka kali ba kan pluh. Hynrei la ong ba donbok ba ha kane ka jingjia ym shym la don mano manor uh ba mynsaw.
Ki Pulit haba ioh jingtip ia kane, kila hiar mardor sha katei ka jaka ban pynlong ia ka jingtohkit.
Ki Pulit kila register case halor kane ka jingjia bad ka jingbuddien ia ki runar kala iaid shakhmat.
