Shillong, Nailar 25 : U Myntri Rangbah ka Jylla Conrad K Sangma ha ka sngi Ba-ar ula ong ba ka dewlynnong Lumpongdeng ba heh 36 acre kam shym la shah kynthup shuh ha ka Umiam 5-Star Hotel project, haba jubab ia ka jingiatai nia kaba lyngkot bala wanrah da u President ka VPP halor ki 10 tylli ki mat dawa ka party.
“Ka Sorkar kala iakren khlem sangeh bad ki kynhun ba don bynta bad ka shimkhia bha ia ki jingsngewkhia u paidbah. Hadien ka dorkhas ka Synjuk ki Rangbah Shnong ka Ri-Bhoi bad ka jingiakren bad u Symbud Myntri Rangbah ha ka 20 tarik Iaiong, 2026, la shim ia ka rai ban pynlait noh ia ka dewlynnong na ka project. Ia kane ka dewlynngoh lah weng noh na ka Concession Agreement” ong u Conrad.
Ula iathuh ba wat hashuwa ban khot tender, ka Empowered Group of Minister hapoh ka jingpyniaid jong u kum u Chairman, ha ka 8 tarik Naitung, 2025, kala rai ba yn ym shah satia ia kano kano ka jingtei ba neh shirta ban pyntrei ha kane ka dewlynnong, lait noh tang kiba shipor kata ruh da ki tiar ba duna ka jingkhia.
“La pynrung ha ka tender bala pynmih ha ka 23 tarik Risaw 2025 bad pynlong shibynta jong ka Concession Agreement bala iasoi ha ka 25 tarik Rymphang 2026 hapdeng ka Directorate of Tourism bad ka Umiam Hotels Pvt Ltd. Ka sosklar kala khang pyrshah ia kano kano ka jingtei ba neh shirta ha ka dewlynnong Lumpongdeng” ula ong.
Ula bynrap ba ka Consent to Establish (CoE) bala ai da ka MSPCB kala khang shai ia ka jingtei ba neh shirta bad ka don ka jingpynbah khlieh ban weng noh lada pynkhein, bad ia ka hok longtrai ia ka jaka kan long beit ka Sorkar.
Haba jubab ia kiwei pat ki mat jingdawa, u Conrad ula ong ba kam shym la don satia ka jingkhang ban tih maw ne shyiap ha Jylla hynrei ia ka jingtih la shah ba kan long kat kum ka ain, ryngkat ban don ia ki lease agreement, Environmental Clearance, Pollution Clearance, watla kam shym don kyndon ia ka jingtih kaba rit hapoh ka MMDR Act, 2016.
Halor ki nonghikai, ula ong ba ka MTET kam dei ka polici ka jylla hynrei ka dei ka Ain ka Sorkar Pdeng hapoh ka RTE Act, 2009, bala pynskhem da ka hukum ka Supreme Court bala pynmih ha ka 1 tarik Nailur, 2025m kaba bthah ia ki nonghikai jong ki klas 1-8 ba dang sah ban shakri sa san snem ne palat ba kin pass ia ka TET hashuwa ka 31 tarik Nailar 2028.
U pyntip ba ula iakren ia kane ka kam bad u Myntri ka Education Ministry ka Sorkar Jylla, bad ka Jylla kala mudui ia ka review petition, bad ia ka MTET yn pynlong man ka por.
Halor ka Meghalaya Private Colleges Act, 2025, u ong ba kane kan pynkhlain ia ka jingshngain ka jingshakri lyngba ki Aided College Funds bad Audit.
Halor ka MPSC bad DSC, ula ong ba ka jingtreikam laitluid ka MPSC ka dei kaba la pynkupbor hapoh ka Article 316 bad 317 bad hap hapoh ka Lokayuta.
Ki jingpynkylla kat kum ka Committee ba khlieh u Prof David Syiemlieh ka kynthup ia ka jingpynbna lypa ia ki syllabus, automated processing, OMR exam, answer key ryngkat ka challenge window ba 7 sngi bad ka jingpynmih online ia ki marks.
Ka jingthaw ia ka DSC naduh u snem 1982 ka pynïahap ïa ka jingpeit bniah jong ka sorkar bad ka jingïashim bynta jong ki paidbah, bad ka SOP kaba thymmai kan buh ia ka paper jong ka ktien lajong ka Jylla, ka cap interview ha ka 12.5% bad ka jingpynmih ia ka result bala buh da ka por.
Halor ki karkhana coke bad dewbilat, u iathuh ba 44 tylli ki karkhana coke kila shah pynpra ha u Naitung 2023 bad 28 tylli ha u 2025 ha West Khasi Hills bad East Jaintia Hills, katba 11 tylli ki karkhana dewbilat ha EJH ki dang don hapoh ka jing peitthuh online bad ym shym la shah satia ia ki karkhana ban treikam khlem ka CTE bad CTO.
