Shillong, Nailar 26 : U Myntri Rangbah Conrad K Sangma ha ka sngi Ba-ar ula iada ia ka jingthungkam biang ia ki Ophisar ba la shongthait ha ki shnat treikam bala thaw kat kum ka ain (statutory bodies), bad ong ba kane kam shym la khang satia ia ka lad iohkam ki samla.
Haba jubab ia ka jingdawa u President ka VPP Ardent M Basaiawmoit ban pynkut noh ia ka jingpynjlan ia ka snem treikam ki Ophisar bala shongthait, u Conrad ula pyntip ha Iingdorbar Thaw Ain, ba ka jingthungkam biang ia ki Ophisar ka dei kaba jia shisien lano bad ka dei tang na ka bynta ka por ba lyngkot.
“Ka jingonng ba ka jingpynjlan ia ka jingshakri ki nongtrei bala shongthait ka khanglad ia ka lad iohkam ki samla ka dei ka bym shisha satia. Ka jingthungka biang ia ki Ophisar bala shonghait ka dei kaba jia shisien lano, na ka bynta ka por ba lyngkot, bad tang khyndiat eh ban don” ula ong.
Ula ong ba kaei kaba ka VPP ka shim kum ka jingpynjlan ka dei ha ka jingshisha ka jingthungkam kat kum ka ain bala pyn kupbor da ki ain ka Sorkar Pdeng.
“Kane kam dei ka jingpynjlan ia ka jingshakri. Ki dei ki jingthungkam sha ki shnat treikam kum ka State Information Commission, Farmer’s Commission, State Food Commission, Public Service Delivery Commission bad RERE kaba donkam ia ki riewshemphang bad kiba la tip bha shaphang ka kam” ong u Conrad.
Ula kdew ba ka kyndon 22 jong ka RERA Act, 2016 ka donkam ia ki Chairperson bad dkhot bala don jingshemphang haduh 15-20 snem ha ka Urban Development bad housing, kyndon 15 jong ka RTI Act, 2005 ka donkam ia u briew ba paw ha ka jingim paidbah ryngkat ka jingtip ha ka ain, science, social service bad administration bad ka kyndon 16 jong ka National Food Security Act, 2013 ka donkam ia ki Civil Servant barim kiba tip bha shaphang ka food security bad ka rep ka riang.
Haba ai jingkhein ia ka iohkam iohkam, u Myntri Rangbah u pyntip ba ha kine ki lai snem bala leit, ka Sorkar kala pyn mih ia ka jingpynbna laitkam ba palat 9000 tylli ki kam bad la pyndap haduh 1011 tylli ki kam lyngba ka MPSC, 2413 lyngba ka Central Recruitment Board for Police, 769 ki doktor lyngba ka Medical Service Recruitment Board bad 1686 lyngba ki District Selection Committee.
U bynrap ba ka jingphaikhmat jong ka Sorkar kam long satia tang ha ki kam Sorkar.
“Naduh u 2019, palat 3.6 lak ki lad kamai la thaw ha ki kam bapher bapher. Tang ha kine ki lai snem bala leit, kumba 50,000 ki lad sengkam bad bylla la thaw na ka bynta ki samla lyngba ki prokram Livelihood nad Entrepreneurship” ong u Conrad.
, bad ong ba kane kam shym la khang satia ia ka lad iohkam ki samla.){kind=link}