Agartala, Nailar 25: U President ka TIPRA Motha Pradyot Kishore Debbarma ha ka sngi Ba-ar, u la kyntait ba don ka jingia teh lok ryngkat ki kyndon bad ka BJP bad ong ba ki hok bad ki jingdawa jong ki trai ri trai muluk Tiprasa ki dei ban wan hakhmat eh ha kano kano ka jingpynbeit sain pyrthei ka ban sa wan.
Haba kren sha ki lad khubor hadien ba u la poi ha Maharaja Bir Bikram Airport, u Debbarma u la ong ba um tip satia ïa kino kino ki jingïakren ba la pyntip bad ba ym don ka BJP ne kino kino ki party kiba la ïakynduh ïa u.
“Kam shym la don satia kaei kaei kaba jia, ym don ba pyntip ia nga bad ym don ba kren ia nga”, u la ong.
Hynrei u la kren shai ba kano kano ka jingïateh lok kan shong ha ka jingpyntreikam ïa ki jingkular ba la ai sha ki jaitbynriew Tiprasa, khamtam ïa kito kiba mih na ka jingïateh kular jong u bnai Lber 2024 kaba kynthup ïa ka sorkar kmie , ka sorkar Tripura bad ka TIPRA Motha.
“Lada ka national party ki kwah ia ka jingiateh lok, ki dei ban ai ia ki briew jong ngi ia ka hok jong ki”, la ong u Debbarma, da kaba buh jingkylli kumno u lah ban wad ia ka jingkyrshan paidbah na ka bynta ka jingiateh lok khlem da pynduh ia kita ki jingkular.
U la maham ba ka TIPRA Motha ka lah ban iakhun laitluid ia ka elekshon lada ym poi ka jingiasngewthuh jingmut, da kaba ong ba ka seng ka don ia ka bor ban iakhun hi dalade.
U Debbarma u la khot ruh ban don ka jingïada kiba kham khlaiñ jong ka riti synshar na ka bynta ki jaka riewlum bad ka lawei jong ki trai ri trai muluk jong ka Tripura.Haba ïadei bad ki jingïada kiba don da ki jaitbynriew riewlum ha kiwei pat ki jylla jong ka thaiñ shatei lammihngi, u la ong ba ki trai ri trai muluk jong ka Tripura ki dei hok ban ïoh ïa ki jingïada kiba kum kita.
Ha kajuh ka por, u la ban jur ba ka jingdawa ban iada ia ki jaka riewlum kam dei kaba la thmu pyrshah ia ka jaitbynriew Bengali.
“Ngim ialeh pyrshah ia ki Bengali ha Tripura.Ngi ialeh ban iada ia ka khyndew ka shyiap jong ngi”, u la ong bad bynrap ba ki nongshong shnong bym dei riewlum hapoh ki jaka jong ka ADC ki dei ban iai bteng ban ioh ia ka hok bad jingiada katkum ka ain jong ki.
U heh jong ka TIPRA Motha u la kynthoh ruh ïa ka state’s political culture, da kaba kynnoh ba ki jingïaleh pyrshah ki la tap lup ïa ki mat kum ka kam ka jam, ka roi ka par bad ka lawei ka ioh ka kot jong ka Tripura.U la pynpaw ïa ka jingsngewkhia halor ki jingïakynad hadien ka elekshon, da kaba ong ba ki jingïakynad saiñ hima sima ki pynsniew ïa ka dur jong ka jylla.
Halor ka jingïadei kaba lah ban don bad ka Congress, u Debbarma u la ong ba u burom ïa ki katto katne ngut ki nongïalam ka Congress hynrei un ym rung ha ka jingïateh lok na ka bynta ka jingmyntoi shimet ne ka pisa tyngka.
“Nga kwah ia ka hok jong ki briew jongnga, bad kata ka long baroh.Ngam kwah ban ialeh badno badno ruh.Nga burom ia baroh”, u la ong.
Haba kylli mano ba bat ia ka jingkitkhlieh halor ka jingkylli jong ka jingiateh lok, u Debbarma u la ong ba ka rai kaba khatduh kan shong ha ki nongjied.
“Ka rai baroh ka shong eh ha ka bor jong u paidbah.Ki paidbah kin rai”, u la ong.
Ka jingkynthoh jong u ka la buh ïa ka jingïadei jong ka BJP bad ka TIPRA Motha ha ka nongrim kaba shai bha, ha kaba ka jingpyntreikam ïa ka jingïateh kular jong ki lailiang mamla bad ka jingai ïa ki hok jong ki trai ri trai muluk ka mih kum ki jingtynjuh ba kongsan ha ka saiñ hima sima shwa ka elekshon.
