Shillong, Nailar 25 : U Myntri Rangbah Conrad K Sangma ha ka sngi Ba-ar ula ong ba kam pat don satia ka jingkhang ia ka jingtih maw bad shyiap hapoh ka Jylla bad ia ka jingtih kat kum ka ain la shah ban bteng hynrei ha ryngkat ki jingioh jingbit.
Haba jubab ia ka jingdawa u President ka VPP Ardent M Basaiawmoit ban weng ia ka jingkhang tih maw bad shyiap, u Conrad ula pyntip ha Iingdorbar, “Kam pat don ka jingkhang ban tih maw ne shyiap ha Meghalaya. Ka jingtih kat kum ka ain ka dang shah hynrei dei ban don ia ka mining lease kaba treikam, quarry permit, Environmental Clearance bad bud ryntih ia ki kyndon ka tnad Khlaw, Pollution bad Transport”.
Ula ong ba u maw bad u shyiap ki hap hapoh ka minor minerals hapoh ka MMDR Act, 1957, bala teh kyndon da ka Minor Minerals Concession Rules, 2016 bad ka Sustainable Sand Mining Management Guidelines, 2016.
U CM u ong ba ki rules kim shym la ailad ia ka jingtih kaba rit lane jingtih nala tynrai bad ka MoEFCC kala pynlong kongsan ia ka Environmental Clearance na ka bynta ki minor minerals khlem da pyniapher ia ki jingheh ne jingrit ki par ba shim wai.
“Ka Committee bala khlieh da u Symbud Myntri Rangbah kala bishar ia ki rules bad ki jingtyrwa ban pynlait noh ia ka rukom tih maw nala tynrai na ki EC barim, hynrei ka Ministry kam shym la pdiang ia ki haba kdew ia ka hukum ka Iingkashari Patna High Court” ula ong.
U Conrad ula ong ba ka Sorkar jong u ka iakhun na ka bynta ka hok ki trai jaka riewlum ha u snem 2019 bad kala ioh ia ka hukum jong ka Supreme Court ba ithuh ia ka hok jinglong trai ki riew shimet, ki Shnong, ki Raid, ki Hima ia ki jaka kynthup ia kiba don sha ramew.
“Kane ka Sorkar kan iai bteng ban shimkhia ia baroh ki ishu bad ka Sorkar Pdeng, ki Iingkashari bad kiwei kiwei khnang ban wad ia ka lad kaba neh” ula ong haba bynrap ba ka Sorkar kala pynbiang tarajur ia ka jingiada ia ka mariang bad ka kamai jakpoh lyngba ka Payment for Ecosystem Services bad spring-shed conservation programme.
Ula ai khublei ia u bah Ardent ba wanrah ia ka met ban iatai bad ong ba ka Sorkar kan bteng ban aiti lut ha kaban leh eiei na ka bynta ki jingeh ki nongtih par.
