Shillong, Nailar 24: Ka tnat Meghalaya Police kala thung ia u Nodal Officer ban pynbeit ia ka jingkhang ia ka leit ka wan ha shilynter ka khappud Assam-Meghalaya bad ban pynthikna ia ka jingiaid laitluid ki kali bad ki briew hapdeng ki arjylla.
Katkum ka hukum ba la pynmih na ka ophis u Additional Director General of Police, Special Branch, Meghalaya, la thung ia u DySP (Security) Bah B Nongsiej, kum u Nodal Officer.
Un ïatreilang bad baroh ki district ha Meghalaya bad Assam ban pynsuk ïa ka leit ka wan jong ki kali bad ki nongleit nongwan.
Ka hukum ka ong ba ia ki jingtip ba bniah jong ki kali kiba sahkut ha Assam bad Meghalaya yn sa iasam bad ka Meghalaya SB Control Room kaba don ha Shillong, ka ban phah ia ki jingtip sha ki pulit jong ki district kiba dei peit na ka bynta ban ai jingiarap bad ban synran.
La bthah ïa baroh ki district Superintendent of Police ha Meghalaya ba kin ïai ïakynduh bad ki Pulit ka Assam na ka bynta ban pynbiang nong synran ïa ki kali bad ki briew kiba ïaid sha Assam bad ïa ki kali kiba wan na Assam sha Meghalaya.
Ka police headquarter ka la iasam ruh ia ki phone number jong ki nodal ophisar bad ki control room jong baroh ar tylli ki Jylla, ba kynthup ia u SP (Zonal) Assam Rajendra Ojah (9707081768), DySP (Security) Meghalaya B Nongsiej (9863060830), SB Control Room, Shillong (9774618462) Control Room, Assam (9181014888) ban pynbeit ryntih ia ka jingiatreilang.
Katei ka hukum, kaba la pynmih da u Inspector General of Police (SB), Meghalaya, kan treikam noh mardor bad kan treikam haduh ban da pynmih da kawei pat ka hukum.
