Tura, Risaw 30: Ka Sorkar Meghalaya kan jied ïa ka constituency ban sdang pyntreikam ia ka pilot project da ka jingthmu ban plie lad ïa ka ïoh ka kot ha ki shnong ki thaw bad ban kyntiew ïa ki lad kamai kajih na ka bynta ki samla lyngba ka MPOWER kaba dei ka prokram jong ka Sorkar Jylla.
Kane ka jingthmu jong kane ka projek kaba la tyrwa kala mih na ka jingialang jong ka Meghalaya Programme for Adolescent Wellbeing, Empowerment and Resilience (MPOWER), kaba la lumlang ia ki ophisar sorkar, ki kynhun kiba donbynta lang ha ki kam pynroi, ki nongsengkam, ki nongpynmih ia ki mar, ki nongmihkhmat na ka imlang sahlang bad ki samla ban ithuh ïa ki jingeh kiba iadei bad ka jingkiew jong ka ioh ka kot bad ban pyntreikam ia ki buit kiba la sei hi da ki trai shnong.
Kane ka sienjam kan pynleit jingmut ha ki liang kiba don ia ka lad ban aikam aijam bad pynkhlain ia ka jingseng kam lajong, kynthup ïa ka kam jngohkai pyrthei, ka jingkhaii pateng ha khappud, ka rep ka riang kaba don dor bad ka jingshna ïa ki marbam na ki jingthung bapher.
Ïa kane ka workshop la pynlong da kaba ïatreilang bad ka Harvard Growth Lab ha Harvard University, ka Meghalaya Institute of Governance bad ka Bharti Institute jong ka Indian School of Business.
Haba kren ia ki nongiashimbynta, u Myntri Rangbah ka Jylla, ula banjur ïa ka jingdonkam ban iaid palat ban ithuh ia ki jingeh bad ban pynleit jingmut ha kaban wad ïa ki lad ban lah ban pynbeit kiba lah ban pynmih ia ka jingseisoh.
“Ka roi ka par kaba neh kan sdang na ka jingpynkylla ia ka rukom pyrkhat, na ka jingkynthoh sha ka jingleh da ki kam bad na ka jingithuh ïa ki jingeh sha ka jingwad ïa ki lad ban pynbeit” la ong u Sangma bad ka bynrap ba dei ban pynleit jingmut ha ki mat kiba shai kdar bad kiba lah ban urlong.
Ula ong, ka jingkiew shaphrang kaba don jingmut kan shong eh ha ka jingshim ïa ka jingkitkhlieh na ka bynta ka jingkylla bad ban pynkylla ia ka jingangnud sha ka kam na ka bynta ki paitbah ka Meghalaya.
Ka jingiakren ka dang khmih bniah ruh ïa ka jingdon jingem ka Jylla, ka jinglah ki trai shnong bad ki lad khaïi pateng ban sngewthuh balei ba ki kam khaïi pateng bad ka jingseng kam lajong ki shem jingeh ba kin lah ban pyniar.
Ka jingïalang ka pyndonkam ruh ïa ka Problem-Driven Iterative Adaptation (PDIA) bad Adaptive Leadership, kiban banjur ha kaban ithuh ia ki daw tynrai jong ki jingeh, ka jingshim ïa ka jingshemphang jong ki nongshong shnong bad ban pyrshang ia ki lad ban leh kum ka jingpyrshang.
U Additional Chief Secretary, Development Commissioner bad Project Director ka MPOWER u Sampath Kumar, ula ong ba ka Meghalaya ka don bha ïa ki lad ban kyntiew ïa ka jingroi jong ka ioh ka kot bad ban thaw ïa ki lad kamai kajih kiba ïahap bad ka jingangnud jong ki paitbah, khamtam eh ki samla.
Lyngba ka MPOWER ka sorkar ka thmu ban pynkylla ia kine ki jinglah sha ka jingkamai kajih kaba iai neh bad ka jingseng kam kaba khlain, ula ong.
Kane ka sienjam kan buh ia ka jingbanjur jong ka jingiatreilang hapdeng ki tnad sorkar, ki bor pyniaid shnong, ki kynhun jong ka imlang sahlang, nongsengkam, nongpynmih ia ki mar bad ki samla ban pynthikna ba katei ka jingtyrwa ia ka jingthmu kan pyni ia ka jingshisha jong ki shnong bad ban shimkhia ia ki jingeh kiba la mad.
Kum ka sienjam kaban dang wan, kane ka jingialang kan ithuh ia ki bynta jong ka jingtynjuh ha ka ioh ka kot bad ki kabu, kumta da ki sienjam kiba lah ban pyntreikam kiba yn sa pynwandur lyngba ka jingiakren. Yn sa jied ia ka projek ha ka constituency bad kaban iaid ryngkat lang bad ka Constituency Development Plan.
Kane ka sienjam ka thmu ban tei ia ka jingkhlain ha ka ioh ka kot ryngkat bad ka jingshimkhia ia ki jingeh jong ka jingroi ha ka jingsengkam bad jingai kam, da ka thong kaba iar ban pyniar shuh shuh ia ki kabu ban kamai jakpoh na ka bynta ki samla ka Meghalaya.
