Shillong, Risaw 10 : Ka Sur ka Bri u Hynniewtrep (SKBH) kala dawa ban tohkit da ka Central Bureau of Investigation (CBI) halor ka jingshah siat iap u Bah Cheristerfield Thangkhiew, General Secretary barim ka kynhun kieng atiar Hynniewtrep National Liberation Council (HNLC).
Ki Nongialam ka SKBH hynne ka sngi nyngkong, kala aiti ia ka dorkhas sha baroh ki MLA ka Ri-lum Khasi bad Jaintia ban pyntip ia kane ka jingdawa bad ban pan ruh ia ka jingkyrshan.
Haba iakren bad ki nongthoh khubor, u Nongialam kane ka synjuk Bah Thomas Passah ula ong ba ka kaiphod jong ka Inquiry Commission kala kren shai ba ki dkhot jong ka Tactical Team-I kala pyndonkam palat pud ia ka bor, kaba lam sha ka jingiap jong u Bah Cherist.
“Jin da iakane ka kam lah leh ha ka rukom kaba dei, kan jin da lam sha ka jingiap u Bah Cherist…ka kaiphod jong ka Commission kala kren shai ba ki dkhot ka Tactical Team-I ka dei ka daw ba lam sha ka jingiap u Bah Cherist bad namar kata, ki dei ia kaban hap tohkit, buh ha ka jingbishar bad ban ai jingpynsajia ia kito kiba donkti ha kane ka kam bymman kat kum ka ain jong ka Ri” ong u Bah Thomas.
U Bah Thomas ula pynkynmaw ba u Myntri Rangbah ka Jylla ula kren shai ba ka Sorkar Jylla ka dang ap ia ka kaiphod ban leh eiei ia kane ka kam bad ba ka sorkar kam pat lah ban leh eiei katba kam pat ioh ia ka kaiphod jingtohkit.
“Mynta ba ka kaiphod kala mih bad ngi kwah ban kylli balei ba ka Sorkar ka sngap jar bad balei kadang artatien ban leh eiei haba pynshong nongrim na kane ka kaiphod” ong u Bah Thomas.
“Ka jingdawa jong ngi ka dei kaba suk, ngi kwah ia ka Sorkar ban aiti noh mardor ia ka case sha ka CBI bad ai ba kan shim ia ki sienjam kat kum ka ain, ban file ia ka chargesheet bad rah ia kane ka kam sha ka Iingkashari” ula bynrap.
U Bah Thomas ula pyntip ba ka jingkynthoh (remarks) jong ka Sorkar ha ka kaiphod kala ong ba “lah ban khot ia ka jingpan jingpynshai” ia kaba u ong ba kano kano ka jingpynshai ka dei ban long hapoh ka Iingkashari.
“Kam long kaba donkam ia ka sorkar ban khot ia ka jingpynshai…ngim kwah ia ka Sorkar ban leh kum ka Judiciary (iingkashari) halor kane ka kam” ula ong.
