Shillong, Nailar 22 : U Myntri Rangbah ka Meghalaya Conrad K Sangma ha ka sngi Saitjain, ula ong ba ka jingialang hapdeng ki nongmihkhmat ka Sorkar Assam bad Meghalaya kala phaikhmat bha halor ka jingwanrah noh kloi ia ka jinglong ba jai jai hadien ki jingjia ba sngewsih ha Shillong.
Ula pynpaw ruh ba ki Sorkar Jylla kin shimkhia ban pynthikna ia ka jingiaid jingieng kaba shngain jong ki briew bad ki kali hapdeng ar jylla.
Haba thoh ha X, u Conrad ula ai khublei ia u Myntri Rangbah ka Assam Himanta Biswa Sarma namar ka jingai ia ka jingiatreilang bad jingkyrshan haba ai jingiaroh ruh ia u Myntri ka Assam Atul Bora, Symbud Myntri Rangbah ka Meghalaya Bah Sniawbhalang Dhar, ki Heh Ophisar bad baroh ki kynhun ba don bynta na baroh ar Jylla namar ka jingiakren kaba tei.
Kane ka jingialang ka dei kaba pynlong namar ka jingmih ki kam thombor ha ka 19 tarik Nailar ha ki kynta iaid rally thuk thuk jong ka seng Khasi Students’ Union (KSU) ha Shillong, kaba iohi ia ki jing thombor ia ki kali ba don u nombor Assam, kaba la wanrah ia ka jingsangeh shipor ban wan pynpoi umphniang na Assam sha Meghalaya.
“Ka kam ba hakhmat eh jong ngi ka long ban wanrah ia ka jingsuk bad ka jinglong ba jai jai kham kloi kat kaba lah bad pynthikna ia ka jingshngain ki nongshongshnong jong ngi. Ha kajuh ka por, ia kito kiba donkti ha ki kam thombor yn sa ithuh bad yn leh tyngeh ia ki kat kum ka ain” ong u Conrad.
Ula ong ba baroh artylli ki Jylla kila kut jingmut ban don ka jingiatreilang kaba jan bad ban iada ia ka jingiadei kaba khlain hapdeng ki paidbah ka Assam bad Meghalaya.
