Shillong, Nailar 12: U Myntri Rangbah ka Jylla u Conrad K Sangma ha ka sngi Balang, ula ong ba ka jingthmu jong ka Sorkar ban pynkynriah ia ki nongdie madan ka dei ban pynneh bad ban iada ia ka lad kamai kajih da kaba pynkylluid ia ki jaka paitbah, bad ula kubur ba kin don beit ki jingtynjuh.
Hadien ka jingkhmih bniah ia ka Polo Vendors’ Market, u Sangma ula ong, ba ka thong ka long da ka lad ban ia jop lang na ka bynta baroh ar ki nongdie madan bad ki nongshong shnong.
Happy to visit the Hawkers’ Market at Polo, a designated and dignified space for our street vendors.
Today, I handed over cheques of ₹20,000 each under the CM Livelihood Grant as one-time support to help our vendors strengthen their livelihoods.
We will continue to stand with… pic.twitter.com/9pFOcWhP6B
— Conrad K Sangma (@SangmaConrad) August 12, 2026
“Ka jingthmu ka jong ngi ka long ban iada ia ka lad kamai kajih katba lah. Hynrei ha kajuh ka por, ngi iohi ba ha ki katto katne ki jaka ka long ka bym pat bit pat biang bha. Ki nongdie ha ki lynti iaid kjat kila kah lynti ia ki paitbah nongleit nongwan bad pynmih ia ka jingpynthud ia ka nongbah” ula ong.
“Kan ym don kano kano ka jingpynbeit kaban biang pura lut nadong shadong. Kan don beit ka jingeh bad ki jingiapeiñ. Ka jingthmu ka long ban wan ia ka lad kaba biang tam kaban ngin don ia ka lad kaban ia jop lang” la bynrap u Sangma.
Ula ai khublei ia ki nongdie madan kiba la ai ia ka jingiatreilang bad ula kyntu ia kiwei pat kynthup ia kito kiba don ha Laitumkhrah bad Jail Road ruh ban kynriah noh sha kiwei pat ki jaka.
“Ngi ngim don hangne ban knieh noh ia ka kamai kajih ka jongno jongno. Ngi sngewthuh ia ki jingtynjuh. Hynrei ngi hap ruh ban pynneh ia ka jinglong jingman bad ban pynlong ia ki lynti iaid kiba kylluid khnang ba ki paitbah kim ym mad ia kino kino ki jingthud jingwit” ula ong.
Halor ka jingpyrshah ban shah pynkynriah, u Myntri Rangbah ula kdew ia ka jingbthah jong ka iingbishar ba kadei kaba hap ban bud ryntih. “Ngi don ia ki jingeh namar ba ka iingbishar ruh kala ai ia ki jingbthah kiba eh. Ngi hap ban bud pyrkhing ruh ia katei. Ha baroh kine kiei kiei, ngi lah leh ia kaba bha tam na ka bynta baroh ki liang” ula ong.
U Sangma ula ong, ba ka jingpynkynriah kan pynmih ia ka jingthud ia mynta hynrei kadei kaba donkam pat ia ka nongbah.
“Kiba bun ki surok kidei kiba lah dep ban pynkylluid. Ki lynti iaid kiba ju don ka jingkah lynti mynshwa kidei kiba la plie mynta. Kane kala urlong namar ba ki nongdie madan kila ai jingkyrshan bad ka jingtrei shitom jong ki ophisar. Ngi kyrmen ba ia kum kane kajuh hi yn lah ban leh ha kiwei kiwei ki jaka ruh” ula ong.
Ha katei ka jingleit jngoh ia ka jaka kaba la tei thymmai ia ka Polo Vendors’ Market, u Myntri Rangbah ula khmih bniah ban ai jaka shong die jingdie ia ki nongdie madan bad ula iakren ruh bad ki.
La pdiang ia u Myntri Rangbah da ki ophisar jongka Shillong Municipal Board bad ki dkhot jongka Town Vending Committee.
U Chairman ka TVC ula pynsngew ha u Myntri Rangbah halor ka rukom pyntreikam ia ka iew bad ia ka jingpynkynriah ia ki nongdie madan na ka thain Polo bad Jail Road.
U Sangma ula sam ruh ia ki cheque hapoh jongka Chief Minister’s Urban Livelihood Grant. Ki nongdie madan kiba don ia ki Certificate of Vending kin ioh ia ka T.20,000 bad ka T.10,000 kum ka jingai jingiarap kaba mardor bad T.2,000 man la u bnai na ka bynta 5 bnai lynter.
Haduh mynta, la dep ban ai 65 tylli ki CoVs ban shong die jingdie mar pyrshah ia ka SBI bad 106 na ka bynta ban die jingdie hajan Matri Mandir.
Ia ka Polo Vendors’ Market la tei ha ka jaka kaba 2,270 sqm kaban don ia ka 620 sqm ka Hawker Area bad 132 tylli ki Stall ne dukan, 48 ngut ki nongdie madan kidei na Polo bad 84 ngut na Jail Road bad 72 ngut ki nongdie madan kila dep ban shimti ia ki jaka ban shong die jingdie.
Ia kane ka jingpynkynriah la leh hapoh jongka Meghalaya Street Vendors Scheme, 2023, da ka Urban Affairs Department bad ki bor pyniaid district jong ka East Khasi Hills.
Ia kum katei ka jingpyrshang kham hashwa la leh ha Khyndailad bad Civil Hospital.
La pynbiang ia ki jingdonkam kynthup ia ki painkhnana, ka jingbuh ia ki bording elektrik ne LED Lights ha man la ki dukan bad 8 tylli ki Halogen Lamps. Ka iew kadei kaba die ia ki jhur, ki soh, ki jain, ki jingbam, dohkha, dohsyiar bad ki dukan kwai.
U Sangma ula ong, ba ka sorkar ka don ia ka jingthmu ban pyniar ia ka jingai jingkyrshan wat ha kiwei kiwei ki jaka ruh.
Ka jingpynkynriah kadei ka jingthmu ban pynsuk ia ka iaid ka ieng jong ki paid nongleit nongwan, ban pynduna ia ka jingdheng kali bad ban thaw ia ka jaka kaba shngain ia ki iew ki hat ha Shillong, da kaba rah ia ki iew ki hat sha ki jaka kiba la pynkhreh bad pynwandur kiba don ia ki painkhana bad kiwei kiwei ki jingdonkam.
“Ngi dang trei sha ka bynta kaban long salonsar bad ka jingkyrshan ia ka imlang sahlang” la ong u Myntri Rangbah.
