SHILLONG, OCT 13: Ka Khasi Students Union (KSU) kala byrngem ia ki kontraktor kiba ai bylla ia ki nongtrei kiba nabar tang da ka jingioh pdiang ia ki ‘Slip’ bad kala byrngem ba kan leh da kaba tyngeh lada ka lap ba ka don kano kano ka jingpynkhein.
Kane ka jingbyrngem kala mih hadien ka jingialang hapdeng ka Central Executive Committee jong ka KSU bad u Labour Commissioner ha ka sngi Nyngkong ban khmih bniah ia ka jingpyntreikam ia ka Identification, Registration of Migrant Workers Act, 2020.
U Environmental Secretary ka KSU u samla Shiningstar Kharbihkhiew ula ong, “Haduh mynta ngi lah lap ha ki katto katne ki jingjia ba bun ki briew kiba nabar kila ioh pdiang tang ia kawei ka Slip katba ki leit pat ban trei ha kylleng ki jaka. Kaei kaba ka seng ka kwah ban pynsngew sha ki kontraktor, ka long lada ka seng ka lap, kan beh bad kan ym pdiang ia kino kino kiba nabar kiba ioh tang ia kawei ka Slip”.
Ula ong, ba u Labour Commissioner ula pyntip ia ka seng ba ia ka aiñ lah dep ban pyntreikam bad lah dep ruh ban pynlong ia ka prokram da ki ophisar ban ai ia ka jingpynsngewthuh.
“Ka jingialang kala long kaba seisoh. Ula pyntip ia ngi ba ka tnad kaba dei khmih bad ka Sorkar kila pyntreikam ia katei ka aiñ” la ong u Kharbihkhiew.
Katkum ka kyndon aiñ, u kontraktor u hap ban shim ia ka Provisional Certificate hapoh jong ka 30 sngi ia ki nongbylla kiba wan nabar ka jylla bad ia ka Original Certificate ba kin treikam na ka bynta ka 179 sngi.
“Na ka liang ka jong ngi, ngin sa shim ia ka jingpynbna paitbah na ka tnad ba kan pyntreikam ia kane ka aiñ bad ka seng ka kwah ban kren da kaba shai ia ki kontraktor bad na ka bynta kito kiba ai kam ia ki briew kiba nabar jong ka jylla” ula ong.
U nongialam ka KSU ula ong, ba kane ka aiñ kadei kawei napdeng jong ki 5 tylli ki mat jingdawa jong ka seng kaba kala buh hakhmat jong ka sorkar.
“Ha ki bnai kiba la dep, ngi lah ioh ban iatai bad u Myntri Rangbah ka Jylla bad ruh bad u Chief Secretary ha kaba iadei bad kane ka aiñ. Ki jingthmu jong kane ka aiñ dei ban pyntreikam hapoh ka Jylla ka jong ngi” la ong u Kharbihkhiew.
Ula bynrap ba ka CEC kan sa bthah ia baroh ki shnad treikam jong ka KSU ba kidei ban leit pynlong ia ki jingkhynra ban pynthikna ba dei ban pyntreikam ia katei ka aiñ.
