Shillong, Nailar 12 : U Myntri ka Koit ka Khiah Bah Wailadmiki Shylla ha ka sngi Balang ula ong ba shen ka Sorkar kan sa leh eiei halor ki jingeh kiba don hapoh ka 108 Emergency Ambulance service hadien ba dep khmih bniah ia ka kaiphod ba dang shen.
“Ngi la pynlong ia ka jingwadbniah bad la ioh pdiang ia ka kaiphod. Ngi la kylliang ia u Director ka NHM bad u Ram Kumar ula wan phai biang. Ngi la iakynduh ia u bad ngin sa khot ia ki nongtrei khnang ba ngin batai ha ki ia ki jingshem” ong u Bah Wailad.
Ula iathuh ba ka Tnad kan sa sam ia ki jingtip ba iadei bad ki jingeh jong ka jingwadbniah bad ki nongtrei.
“Halor kane ngin sa batai ha ki ia ki jingshem bad ngin sa buh ia katto katne ki jingtyrwa. Hadien kane, kan shong ha ki la ki pdiang ne em” ula bynrap.
U Myntri u pynpaw ba ki jingpyrshang kila iaid shakhmat ban pynbeit kham kloi ia kane ka kam.
