Shillong, Nailar 12 : U Myntri Rangbah ka Jylla Conrad K Sangma ha ka sngi Balang ula ong ba ka Meghalaya ka don ia ka sap ban sei ia ki kyrtong kiban jop/pass ia ki comptetitive eksam ka UPSC bad kiwei kiwei, hynrei ka donkam ban tei ia ka rukom treikam kaba khlain ban btin lynti, ai jinghikai, kyrshan pisa bad ki nongai jinghikai (mentorship), ban iarap ia ki samla ba kin sei ia ka sap ba pura jong ki.
Attended Ascent 2026 at MATI, a seminar focused on building a strong ecosystem for success in UPSC and other competitive examinations, and distributed CM-Aspire cheques to seven candidates who cleared the UPSC Civil Services Preliminary Examination.
Meghalaya has no shortage of… pic.twitter.com/q7AKGBoiZu
— Conrad K Sangma (@SangmaConrad) August 12, 2026
Haba kren ha ka ‘Ascent 2026’, ka seminar bala pynlong da ka Meghalaya Administrative Training Institute (MATI) hala ka jong ka campus ha Mawdiangdiang, Shillong, u Conrad ula ong ba ka CM-Inspire prokram ka Sorkar ka dei kaba la pynwandur ban thaw ia kum kine ki rukom treikam ki ban lah sei ia ka sap jong ka Jylla.
Ula ong ba ka Meghalaya ka la dei ban sei ia bun bun ngut ki kyrtong kiba pass ia ka UPSC bad kiwei ki competitive eksam ka ri namar “kam kyrduh satia ia ki sap” hapoh ka Jylla.
“Ka jingeh ka shong ha ka jingai ia kata ka rukom treikam, ban wanrah lang ia ki kynhun ba don bynta, wanrah ia ka jinglong jingman kaba dei, btin lynti ia ki samla pule jong ngi ha ka lynti kaba dei, bad iarap ia ki ba kin kynjoh ia ka thong dalade bad ruh ia ka thong na ka bynta jong ngi kum ka Jylla” ula ong.
Na ki 30,000 ki samla ialehkai sha ka jingthrang ban ioh Olympic medal
U Conrad ula nujor ia ka CM-Inspire bad ka STAR prokram jong ka Sorkar, kaba la pynlait san snem mynshuwa da ka Tnad ialehkai ka Jylla.
Hapoh ka STAR, ka Sorkar kala leit sha man ki shnong bad khmih bniah ia jan 30,000 ngut ki samla, katto katne ki dei ki bym pat ju phong ia ki juti mareh lane leit sha ki jaka test ia ka jinglah ialehkai jong ki. Ka prokram kala lah ban ithuh haduh 10 ngut ki nongialehkai ia kaba u Conrad ula ong ba ki dei ki “Super Athlete”- napdeng ki top1% jong ki sap ka pyrthei.
Ia kine ki nongialehkai ba jied la wan ialam sha Shillong bad la pynbiang ia ki da ki jingpule, bam tei met, jingiasyllok ban pynkhlain iaka bor pyrkhat, physiotherapy, kilan met bad ai jinghikai.
“Ka prokram kala phah ruh ia ki sha ki Centre of Execellence kiba don hapoh ka ri bad shabar ri ba kin leit pyntbit kyrpang. Ka thong jong ka Sorkar ka long ba iwei na kine ki nongialehkai kin ioh khur ia ka Olympic medal ha u 2036” ong u Conrad.
U ong ba kum kane ka sienjam ban ithuh ia ki sap, buh ia ka thong bad tei ia ki lynti ai jingkyrshan ba donkam, ki dei kiba la pyndonkam lang ha ki competitive eksam lyngba ka Cm-Inspire.
Ha kane ka prokram, u Myntri Rangbah bad kiwei ki kynrem ki lyndan kila san ia ka cheque CM-Inspire ba mar T.50,000 sha ki 7 ngut ki kyrtong kiba la pass iaka UPSC Civil Services Preliminary Examination.
Ha u Conrad, ka thong ba kham heh ka iar palat ban ia ka jingpynbha ia ka result jong kiba iakhun ia ka eksam UPSC na Meghalaya.
“Kam dei eh tang shaphang ka Meghalaya. Ngi kwah ba ki samla ka Meghalaya kin synniang sha ka jingtei ia ka Ri” ula ong haba mutdur ia ka lawei ba kin don mano re mano na ka Jylla ki ban long ki Home Secretary lane Cabinet Secretary jong ka Sorkar India.
U Conrad ula kdew ruh ba ki competitive eksam kam dei satia tang jong ka UPSC. “Kam dei eh tang ia kawei ka eksam. Ki don kumba 20-30 tylli kum kine ki eksam. Ki don shibun kiei kiei kaba ki briew kim pat tip satia” ula ong hakhmat ki samla kiba kwah ban long eiei ha ka jingim.
Haba pynkut, u Myntri Rangbah, ula pan ia ki jingai jingmut bad ki jingpynsngew na ki paidbah ban lah pynajanai ia ka CM-Inspire programme haba kubur ba ym don satia kaei kaei ruh kaba biang nadong hadong bad ka don beit ka jaka ban pynbha ia ki.
U Myntru Rangbah bad ki Heh Ophisar kila sam ruh ia ka CM-Inspire cheque ha kane ka jingialang. Hynniew ngut ki kyrtong kiba la pass ia ka UPSC Civil Services Premilinary Examintation kila ioh ia ka cheque ba mar T.50,000.
U Myntri Rangbah ula plie paidbah ruh ia ka Digital Learning Lab jong ka Meghalaya Administrative Training Institute ha kane ka jingialang.
, ban iarap ia ki samla ba kin sei ia ka sap ba pura jong ki.){kind=link}