Shillong, Nailar 12 : Ka Meghalaya High Court kala hukum ia ka NHIDCL ban pynieng ia ki jingker (crash barrier) ha baroh ki jaka kiba don jingma ha shi lynter ha surok Shillong-Dawki hapoh ka hynriew taiew.
Haba bishar ia ka PIL ha ka sngi ba-ar, u DSGI Dr N Mozika ula pyntip ia ka iingkashari ka Chief Justice Revati Mohite Dere bad Justice W Diengdoh ba ka kompani kala dep aiti ia ka contract ban pyntrei ia ka kam bad yn pyndep ia ka hapoh ka hynriew taiew.
“Ia ka contract lah dep ban ai ban pynthikna ba ki jingker kin ieng ha baroh ki jaka kiba idon jingma. Ia kane ka kam yn pyndep hapoh ka hynriew taiew” ong u Dr Mozika haba aiti ia ka kaiphod halor ka jingiaid ka kam kat haduh ka 11 tarik Nailar.
Ula pyntip ruh ia ka Iingkashari ba ka NHIDCL kala aiti ia ka ambulance kaba la pynbiang lut ki tiar nadong hadong sha ka PHC ha Pongkung bad kala dep shna ia ka surok ba shah rong dang shen.
Halor ka jingkam ia ki jingjulor, ka Iingkashari kala pynpaw ba ka PWD kala phah ia ka mang pisa ba T.1.72 klur sha u ADC ka East Khasi Hills.
U Dr Mozika u iathuh ba ka NHIDCL kan sa leh la ka jong ka jingkhein jingdiah ia ka jingjulor ka Mawlieh LP school bad yn sa aiti ia ka kaiphod ha tarik ban wan.
Ka Iingkashari kala bthah ia u Deputy Commissioner ka East Khasi Hills ban leh eiei halor ka shithi ka PWD ba 20.05.2026 ba iadei bad kane ka kam.
Ka kashari kala bthah ruh ia ka NHIDCL ban siew T. 1 lak sha u Amicus Curiae Philamon Nongbri haba pyrkhat ia ka jingiarap ba ula ai kynthup ka jingleit jurip ia ka jaka, hapoh ka shi taiew.
Ia kane ka kam la buh ban bishar biang ha ka 7 tarik Nailur.
 ha baroh ki jaka kiba don jingma ha shi lynter ha surok Shillong-Dawki hapoh ka hynriew taiew.){kind=link}