Imphal, Nailar 9: U Myntri Rangbah ka Jylla Manipur Yumnam Khemchand Singh ha ka sngi u Blei u la ïashim bynta ha ka Har Ghar Tiranga Yatra kaba la pynlong da ka Imphal Central District jong ka Bharatiya Janata Party (BJP) bad ka Singjamei Mandal BJP ha Imphal.
Ia u Myntri Rangbah la synran lang da ka kurim jong u ka Joybala Yumnam, u in-charge ka BJP Manipur u Dr Ajeet Gopachade, ka state president ka BJP ka Adhikarimayum Sharda Devi, ki MLA ka BJP u Thokchom Radheyshyam bad u Kh Joykishan Singh, nalor ki nongtrei ka party bad ki nongkyrshan na ka Singjamei Assembly Constituency.
Haba ai jingkren ha kane ka jingialang, u Khemchand Singh u la ban jur ia ka jingdonkam ban don ka jingiatylli hapdeng baroh ki jaidbynriew ban iada ia ka jinglong trai jaka jong ka Manipur.U la ong ba ki Meiteis, ki Naga bad ki Kuki kim dei ban pyrkhat tang ha ka liang ka jaidbynriew lajong hynrei ki dei ban iatrei lang na ka bynta ka jylla Manipur.U la khot ruh ia ki Meiteis ban leh ia ka bynta kum u “hymmen rangbah” ban pynlong ia ka jylla kaba iatylli.
U myntri rangbah ka jylla u la kdew ruh ia ka jingleit jngoh jong u dang shen sha Kangpokpi, da kaba ong ba u la ioh ia ka jingpdiang sngewbha na ki paidbah bad u la shem ba kam don satia kano kano ka dak ka shin ba don jingthmu ban khang ia ki surok bah.U la kynnoh ba ki don ki kynhun kiba pyrshang ban pynmih jingïapher hapdeng ki jaidbynriew.
Haba iadei bad ka jingleit jngoh jong u ia ka Jiribam, ha kaba ki briew na ki jaidbynriew bapher bapher ki la iawan lang na ka bynta ka jingsuk, u Khemchand u la pynpaw ia ka jingsngewkhia halor ka jingbthei bom ha ka shnong Tronglaobi ha Bishenpur district kaba la pyniap ia arngut ki khynnah.U la ong ba kum kine ki jingjia ki pyni ba ki don ki briew kiba pyrshah ban wanrah biang ia ka jingsuk ha Manipur.
U Myntri Rangbah ka Jylla ula kyrpad ïa ki briew ban ïatylli kum ki nong India bad ban trei na ka bynta ka jingthmu jong u Myntri Rangbah duh ka ri u Narendra Modi ban ïoh ïa ka Viksit Bharat bad ka Viksit Manipur.
U in-charge ka BJP Manipur u Dr Ajeet Gopachade u la ong ba ka jylla ka iaid sha ka bynta jong ka jingsuk bad ka roi ka par hapoh ka jingialam jong u Khemchand Singh, haba iaroh ia ka jingiashim bynta jong ki longkmie kiba la shlur ia u slap ban pynlong ia ka Tiranga Yatra kaba jop.
Ka state president jong ka BJP, ka Sharda Devi, ka la ong ba ka sorkar BJP ka dang pyrshang ban wanrah biang ia ka jingsuk bad ka la kdew ba u Myntri Rangbah ka jylla u ju leit jngoh man ka por ia ki district jong ki jaka lum ban pynsuk ia ka jingwanphai biang jong ka jinglong jingman.Ka la pynskhem ba ka BJP ka dang iai bteng ban rah ia ka Manipur sha ka jingsuk bad ka roi ka par.
 bad ka Singjamei Mandal BJP ha Imphal.){kind=link}