Shillong, Nailar 09 : Ka Meghalaya School Welfare Development Association (MSWDA) kala aipor shibnai ia ka Sorkar Jylla ban pynbeit ia ka jingialang bad u Myntri Rangbah Conrad K Sangma, ban iakren ia ki mat ba kongsan ha ka kam pule puthi.
Ia kane ka rai la shim ha ka jingialang jong ki trai skul bad ki bor pyniaid skul kaba la pynlong ha Khasi National Dorbar Hall, Mawkhar ha ka 8 tarik Nailar, kaba la pyniaid da u President HM Marbaniang.
Ka Association kala shim ruh ia hynriew tylli ki rai bad ong ba kin sa aiti sha ka Sorkar MDA lyngba ka Tnad Pule Puthi.
U Bah Marbaniang ula iathuh ba ka jingialang kala bishar halor ka Meghalaya School Performance Grading Index ba pynmih dang shen bad ban jur ba watla ki pdiang ia ka jingai kyrdan ia ka jinglah treibha, ka Sorkar ka dei ruh ban pynbeit ia ki jingeh kiba la sahteng la slem kiba don ha ki skul.
“Ka MSPGI kan iarap ia ki skul ban ithuh ia ki jingkhlain bad ki jingduna, hynrei tang lad aka Sorkar ka pynbeit ia ki jingeh ha ki jingtei, ka jingdon nonghikai bad ka jingbei tyngka, ka jingtreikam bha kan nym kiew” ula ong.
Napdeng ki jingdawa kiba hakhmat ka dei ka grant-in-aid ia ki skul secondary bad higher secondary kiba la don shabar jong ka rukom treikam watla kila ai ka jingshakri la bun snem.
Ka Association kala pynsngew ruh ia ka jingeh jong kumba 1544 ngut ki skul SSA Non-NOC Lower bad Upper Primary, bad sa kumba 110 ha ri-lum Garo, kaba ki ong ba ki dei kiban dang ioh ia ka jingkyrshan kaba biang.
Kiwei pat ki rai ki pynleit jingmut halor ka jingpynkhlain ia ki skul Pre-Primary bad Lower Primary, pynbeit ia ka jingeh ki nonghikai kiba la pyndep ia ka D.El.Ed lyngba ki NIOS, pynheh ia ki jingtei, bad pynjanai ia ka jingpule computer, science lab, library, sports bad kiwei kiwei.
Ka Association kala kyntu ruh ban pyntreikam bha ia ki skhim ka Sorkar Pdeng kum ka PM-POSHAN, Uniform Grant bad ka Composite School Grant.
U Bah Marbaniang ula ong ba ka jingthmu hi kam dei tang ban shu buh ia ki jingeh hynrei ban kyntur ia ki lad ban pynbeit kiba neh.
Ula pynkynmaw ba kum kane ka jingiasyllok la pynlong ha Tura ha ka 20 tarik Jylliew na ka bynta ki skul ka ri-lum Garo.
Ka Association ka khmih lynti ba ka Sorkar kan ai jubab hapoh ka shibnai bad ban pynbeit ia ka jingialang bad u Myntri Rangbah.
 kala aipor shibnai ia ka Sorkar Jylla ban pynbeit ia ka jingialang bad u Myntri Rangbah Conrad K Sangma, ban iakren ia ki mat ba kongsan ha ka kam pule puthi.){kind=link}