Shillong, Risaw 09 :Ka Meghalaya kala mad ia ka jingshah rem ha baroh artylli ki lympung ialehkai ka BCCI hynnin ka sngi saitjain ba kynthup ia ka lympung Vinoo Mankad Trophy bad ka Women’s U-19 T20 Trophy.
Ha ka Vinoo Mankad Trophy, ka Meghalaya kala shah rem da phra wicket ha ka Goa katba ka Delhi kala jop ha kawei pat ka jingialehkai da 10 wicket.
Ha ka Vinoo Mankad Trophy kaba dei ka jingialehkai On Day ki khynnah U-19, ka Goa kala jop ia ka jingkynting pisa bad jied ban kawang bol shwa. Kane ka jingialehkai kala long ha Pune bad ka Meghalaya kala lah ban tied tang 180 run bad hap 7 wicket ha ka 50 over.
U Nongtied ba nyngkong u Mrityunjay Bharali ula lah ban kamai 65 runs bud sa u Mrinal Das ba kamai 53 runs, kaba la buh ia ka jingialehkai paralok hapdeng kine ki arngut haduh 108 runs. Hynrei kiwei ki rang ialehkai ki khlem lah satia ban neh slem bad ban kamai run lait noh u Shavian Blah uba kamai 36 runs.
Hynrei kane ka thong bala buh da ka Meghalaya kala duna palat kaba pynlong ia ka Goa ban lah beh tang ha ka 33.2 over da ka jingkamai 181 runs bad hap tang 2 wicket. Kine ki wicket ki dei kiba la shim da u Bharat Gurung uba ai kamai 26 run bad u Raghav Magotra uba ai kamai 44 run.
Ka Meghalaya kala shongthait shisngi shuwa ba kan ialehkai pat pyrshah ia ka Tripura ha ka sngi nyngkong. Ka Tripura kala shah rem ha ka Rajasthan hynnin ka sngi saitjain katba ka jingialehkai ba nynkong kala shah pynthut ha u slap.
Ha ka jingialehkai Women’s U-19 T20 ha Hyderabad, ka Delhi kala donkam ia ka jingjop ban ioh ia ka jaka ba nyngkong ha ka Group B bad ban ioh rung sha ka kylla ba-ar, kala ioh ia kaei kaba ka kwah.
Ka Meghalaya kala jop ia ka jingkynting pisa bad jied ban tied nyngkong hynrei ki nongkawang bol ka Delhi kila lah ban tehlakam ia ka Meghalaya tang hapoh ka 12 over bad ai kamai tang 24 run. Ka Delhi kala beh ia kane ka thong tang hapoh 2.3 over khlem da hap wicket.
Ka Meghalaya kala pynkut ia ka jingialehkai ha ka Group B ha ka kyrdan ba saw da ka jingjop ba arsien pyrshah ia ka Goa bad ka Sikkim kiba don shatrai ha ka miej iakhein point.
