Tura, Risaw 09: Ka kurim u Myntri Rangbah ka Jylla Dr Methab Chandee A Sangma, kala noh synniang da ki song jingbam tei met sha ka Ophis u District TB Officer ka West Garo Hills, ban sam sha ki 17 ngut ki nongpang TB kiba wan na ki longiing ba duk, kiba hap hapoh ka Tikrikilla PHC.
Ia kine ki song jingbam la sam sha ki nongpang TB da ka Dr Litha Sangma, District TB Officer, Dr Thimonier Momin, Medical Officer bad Dr Khona, Joint Director bala shongthait bad ba dang trei mihsngewbha mynta.
Ia kine ki song jingbam lah ai kat kum ka TB Health Scheme bala pyllait paidbah dang shen ia kaba la tip kum ka “Pradhan Mantri TB Mukt Bharat Abhiyan” kaba hap hapoh ka shatei jong ka “The National Tuberculosis Elimination Programme”, kaba thmu ban kyrshan ia ki nongpang TB da ki jingbam ba tei met.
Kat kum kane ka skhim, la sam ia ka song jingbam manla u snem haduh 1 snem kynthih khnang ba ki nongpang kin ioh ia ki jingbam ba tei ia ka met. Kine ki jingbam ki kynthup ia dai, u chana, u nutrela bad ki biscuit.
Ka Dr Litha kala kala pynshai ia ki nongpang TB halor ka jingkongsan ban bam ia ki jingbam ba tei ia ka met khnang ba kan pynkhlain ia ka bor met ba kin iakhun pyrshah ia ka jingpang Tuberculosis. Kala kyntu ruh ia ki nongpang ba kin bam ia kine ki jingbam bad ban dih ia ki dawai khlem sangeh bad hapoh ka por khnang ba kin ioh ia ka jingkoit ba pura na ka jingpang.
Ka Dr Litha kala kyntu ruh ia ki nongpang ba kin kiar na ka jingdih duma bad ka kyaid khnang baka dawai ba ki dih kan lah ban iarap ia ka met ba kan iakhun ia ka jingpang.
Ka Dr. Khona kala kren halor ka jingdonkam ban leh khuid bad pynshlur ia ki nongioh jingbam, ki nongsumar bad ka Imlang sahlang ba kin wan shakhmat bad kyrshan ia ki nongpang TB khnang ba ka District bad ka Jylla kan lah ban iakhun ia ka jingpang TB bad ban ioh ia ka imlang sahlang ka bym don shuh ki nongpang TB.
