Shillong, Risaw 09: Ka kynhun niah thuk thuk “Tornadoes” jong ki shipai Army Service Corps, kala mih noh hynne ka sngi U Blei na Nongbah Shillong hadien ka jingleit buh syntiew ha u mot sahnam jong ki shipai ba khlad ha ka jingialeh thma (War Memorial).
Ia kane ka kynhun ba 16 ngut ki nongniah thuk thuk Roral Enfield jong ki shipai, la kaweh lama na 101 Area, Shillong da u Lt Gen KC Panchanathan, AVSM, GOC 101 Area.
Kane ka dei shibynta na ka 2600km Motorcycle Expedition ba 17 sngi jong kane ka kynhun niah thuk thuk kaba long ruh kum ka jingpynkhreh ia ka jingrakhe ia ka 11th Reunion bad ka 262nd Corps Day ka Army Service Coprs ka ban long ha ka 8 tarik Nohprah, 2022.
Kane ka Expedition ka la sdang naduh ka 1 tarik Risaw na Tezpur, Assam bad kala lyngba ka Tenga Valley, Bomdila-Sela Pass-Tawang- Fwd Post ka Tawang- Kalaktang – Guwahati-Shillong- Kombrian – Imphal – Dinjan bad kan pynkut ha Gajraj War Memorial, Tezpur ha ka 17 tarik u Risaw.
Kum ban shu kdew, kane ka kynhun niah thuk thuk Tornadoes ka dei kaba la pynkha naduh u snem 1967 bad kala bat haduh 32 tylli ki World Record. Kane ka kynhun ka dei kaba don ha ASC Centre (South) Bangalore bad ka kynthup haduh 39 ngut ki nongniah thuk thuk ba kynthup ia 2 ngut ki Ophisar, 2 ngut ki Junior Commissioned Officer bad 35 ngut kiba dei jong ki kyrdan bapher bapher.
Kane ka kynhun kala mihkhmat ia ka India haduh hynriew sien ha ki jingiakop niah thuk thuk ha Bhutan. Ka kynhun kala ioh haduh khyndai tylli ki World Record ha u Naiwieng 2020 ha ki jingiakop niah thuk thuk bapher bapher kynthup ia ka jingniah jngai tam lyngba ka tunnel ba tbeh ding bad ka kiew ia u lum Pyramid ba jrong bad ba sted tam.
