Shillong, Nailar 7: Ki karkhana thain jain kila iai bteng ban long ki tyllong ka kamai jakpoh ha ki thain nongkyndong jong ka Meghalaya, da kaba kyrshan ia palat 50,000 tylli ki longiing ha kylleng ki bynta jong ka jylla, ha kaba ki kynthei kila don palat ia ka 70 percent ban trei ia kane ka kam, la ong u Myntri Sorkar uba khmih ia ka Tnad Textiles u Bah Metbah Lyngdoh hynne ka sngi Thohdieng.
U Bah Lyngdoh ula kren ia katei ha ka jingplie ia ka Handloom Week ha State Guest House kaba la pynlong da ka Tnad Textiles kum shi bynta jong ka jingrakhe ia ka National Handloom Day 2026.
U Myntri Sorkar ula leit ban jngoh ia ki dukan kiba pyni nam ia ki mar kiba la pynmih da ki nongthain ka jylla, ha ryngkat ka jingdonlang u Principal Secretary jong ka Tnad Textiles u Bah F.R. Kharkongor, ki heh ophisar sorkar bad kiwei kiwei.
Nalor kane, ula pdiang ruh ia ka lama jong ka ri hapoh jong ka mat “Har Ghar Tiranga” Campaign.
Haba kren ha ka jingialang u Bah Metbah ula ong, ba ka National Handloom Day kadei ka sngi kaba kyrpang ban burom ia ka jingtrei shitom, ka sap ka phong bad ia ka jingtbit jong ki nongthain kti ia ki jain bad ka jingai jingithuh ia ka jingtrei shitom lang jong baroh kiba donbynta lang ha ka kam ha kaban pynkhlain ia katei ka bynta.
“Ka Handloom ne jingthain jain da ki kti, kadei ka karkhana kaba iai bteng ban long kaba kongsan ban kyntiew ia ka iohkam iohjam ha ki thain nongkyndong, khamtam ha kaban kyrshan ia ki longiing longsem kaba palat ia 50,000 tylli ki iing kaba kynthup ia ki kynthei haduh 70% kiba trei ha kane ka kam” ong u Bah Metbah.
Ula pynpaw ba ka kamram jong ka Handloom ban pynneh pynsah ia ka jingriewspah ka jylla Meghalaya ia ki riti dustur bad ki kolshor kiba la rim la jah lyngba ka kam thain jain bad ula ong, ba ia ka National Handloom Day, la pynlong man la ka snem ha ka 7 tarik u Nailat kum shi bynta ban kynmaw burom ia ka Swadeshi Movement 1905, kaba ai mynsiem ia ki karkhana tynrai bad ban pyndonkam ia ki mar kiba la pynmih hi hapoh jong ka ri.
U Myntri Sorkar ula ong, ba ka Tnad Textiles kala pyntreikam ia kiba bun ki skhim jong ka Sorkar Pdeng bad Sorkar Jylla ban pynkhlain ia ki jingtei, ban kyntiew ia ki sap ki phong, ban kyrshan ia ki nongrep, ki nongthain bad ia ki lad ban pyniaid ha ki iew ki hat khnang ba ki nongthain jain kin iohpdiang da ka dor kaba biang bha ia ki mar kiba kila pynmih.
Ula kyntu ia baroh kiba donbynta ba kin bteng ban iatreilang ban pynkhlain ia ka ‘Handloom’ kam thain jain ha ka jylla bad ban iada ia ka jingriewspah kaba naduh hyndai hynthai na ka bynta ki pateng kiban dang wan.
