London, Risaw 9: Ki paid riewlum ki Jylla ka thain Shatei Lam Mihngi kiba sah ha United Kingdom, kila pynpaw nam iala ki jong ka tynrai da kaba pynlong ia ka mattithaw bad deiriti tynrai (Arts & Culture) bad ka jingpyni nam (exhibition) ha London ha ka 7 tarik u Risaw.
Ia kane ka prokram la pynlong da ka North East Support Network (WNESN) UK ha ryngkat ka jingiatreikam bad ka Nehru Centre, London.
Ka WNESN ka dei kaba la pynkha ha u snem 2020 ha ka por ba lynshop ka khlam bad ka dei ka kynhun ki Kynthei kiba dei na ki Jylla ka thain Shatei Lam Mihngi ka Ri India, ka ba kyrshan markylliang ia ki Jaidbynriew kiba dei na kane ka thain.
Ka Nongaiktien ka WNESN, Afifa Fatemi kala ong “Kum ka kynhun ngi thmu ban kyrshan mar kylliang bad ia baroh ki jaid bynriew ka thain Shatei Lam Mihngi ka Ri India lyngba ka jingpyni nam ia ki phra tylli ki Jylla ka thain Shatei Lam Mihngi kum ka jaka shangkai pyrthei bad ruh ban kyntiew ia ki mattithaw bad ka deiriti tynrai jong kane ka thain ha ki rynsan jong ka pyrthei”.
Ka WNESN kala pynlong ia kane ka prokram ha ka 7 tarik Risaw, ha kaba ki nongiashimbynta kila ioh ban sakhi ia ki jaka ba ithiang bad ba pynngad jong ki Jylla kiba don hakjat jong u lum Makashang.
Ki Nongshad bad nongput nongtem tynrai jong ki Jylla kane ka thain, kila pynshoh biej ia ki nongiashimbynta da ki sur jingput jingtem, jingrwai bad jingshad nala tynrai ba kynthup ia ka jingshad Bihu, Sattriya Nritya jong ka Jylla Assam, ka jingshad Khasi bad ka sur khana u Sier Lapalang na Meghalaya, ka jingshad Krishna na Manipur, ka jingrwai Khuangchawi thla jong ki Mizo kaba dei ka jingrwai lehkmen ia ka aiom kheit nalor ki jingpyni nam ia ki jaka shangkai jong ki Jylla bapher bapher ka thain.
Ia kane ka prokram la pynshongkun da ka jingiadonlang u High Commission ka Ri India u Vikram Doraiswami bad u Deputy Director ka Nehru Centre u Sanjay K Sharma.
Haba ai jingkren u Vikram ula ong “Kane ka dei ka kabu ban tip bad shemphang ia ka jingriewspah ka Ri India ha ka deiriti. Kane ka dei kaba kyrpang bha. Kawei pa kawei ka Jylla NE ka don la ka jong ka deiriti, jingleh tynrai, ka mattithaw kiba dei jong ki Jaidbynriew ka thain”.
Ka WNESN kan sa pynlong ruh ia ka jingpyni nam ia ki tiar tynrai jong ki Jyla ka thain Shatei Lam Mihngi ka Ri India ha Nehu Centre, London naduh ka 10 tarik haduh 14 tarik u Risaw ban pyniap biej ia ki briew ba wan na kylleng ki Ri ka pyrthei ha UK.
