Shillong, Risaw 08 : Ka Jylla Meghalaya kala kynjoh mynta u 2022 ia 50 snem ka jingioh iala ka jong ka Jylla ba pura hynrei mano ban poi pyrkhat ba haduh hynriew tylli ki Shnong ka Thain Sohra , kaba dei ka jaka ba khring duh ia ki nongshangkai pyrthei, kim pat ju iohi surok haduh mynta mynne.
Kine ki Shnong ki dei kiba hap hapoh ka Raid Mawmang bad ki dei kiba jngai tang hapoh ka 53 km na Nongbah Shillong. Kine ki Shnong ki kynthup ia ka shnong Sder, Maiong, Mawsohmat, Khohber, Warbar bad ka Tluh.
Ki nongshongshnong jong kine ki hynriew shnong haduh mynta ki dang hap mad ia ka jingeh ha ka leit ka wan la ka dei ha ka leit iew leit hat, leit siew leit tda ne wat ha ka leit shim dawai haba pang ba shitom. Ki nongshongshnong ka thain ki hap ban iaid kjat hapdeng 2 kynta haduh 4 kynta ban poi sha ka Shnong Kongthong, kaba la don ia ka surok.
Kine ki hynriew tylli ki Shnong ki hap ban iaid kjat sha Kongthong ban ioh kali haba ki donkam ban leit shim dawai ne leit iew leit hat, kaba long ruh kumjuh wat ia ki Khynnah skul.
“Ka jingbym don surok haduh mynta kala buh jingeh bha ia ngi ki nongshongshnong jong ki hynriew shnong ban kit ia ki marbam mardih khamtam eh ha ka pang ka shitom” ong ki nongshongshnong ka thain haba iakren bad u nongthoh khubor Ka Shlem uba la poi sha katei ka thain.
Uwei na ki rangbah napoh ka shnong Sder u ba dang kit synsar ula iathuh ba wat haka rta ba 48 snem u dang hap ban kit synsar ba u dang hap ban iaid palat 5 kynta ban leit bad wan namar haduh mynta kane ka shnong kam don iaka surok.
Une u rangbah ula iathuh ba ka shnong Mawmang ne ka shnong Sder ka dang don shibun ki jingdonkam hynrei ia kane ki paidbah kim ud kim thlai namar kaba kongsan ba ki paidbah na ki hynriew tylli ki shnong ki kwah eh, kadei ka surok naduh napoh ka shnong Kongthong kaba iaid lyngba ka shnong Mawmang ter ter shaduh ka shnong Tluh.
“Watla ngi mad shibun ki jingeh ha man la ki shnong hynrei ngim kynnoh iano iano ruh namar khlem ka surok ka long kaba eh iaki paidbah ban pdiang ia kiwei ki jait kam pynroi hapoh ki shnong. Kum ha kane ka juk mynta, ki nong shong shnong ka thain Mawmang bad ki shnong ka thain, ngi kwah ba ka sorkar kan ialeh katba lah ban pynioh surok noh hapoh kane ka thain” ong une u rangbah na Mawmang.
Kawei ka longkmie kaba kit iala i khun kynthei ba dang 1 snem, kala iathuh ba kala la mih napoh ka shnong Mawmang haduh 8 baje mynstep ban leit shim dawai na Kongthong Sub-Centre bad kan shim por kumba 2 kynta shiteng ban poi sha kane ka jaka shim dawai.
Kane ka longkmie kala iathuh ba ka jingbym don surok ka buh jingeh iaki paidbah ym tang ban kit iaki marbam hynrei wat ban ioh ki lad jingsumar namar ki hynriew tylli ki shnong hapoh kane ka thain kim don ki jaka sumar.
“Hooid ki don ki ASHA kiba ai dawai lada pang malu mala hynrei lada donkam ban leit phah sumar shaki jaka sumar, ki paidbah ki hap ban kit iaki nongpang haki khoh kumba 2 kynta tam ban poi sha Khrang PHC lane da ka kali sha nongbah Shillong” la ong kawei ka longkmie.
Naka liang u Sordar ka Raid Mawmang u bah Arman Majaw ula iathuh ba haka jingshisha ki Sordar bad ki rangbah shnong jong ki hynriew tylli ki shnong naduh ki snem bala dep kila dep ban phah ki jingthoh sha ka sorkar hynrei haduh mynta kine ki jingthoh kila shu sahkut tang ki jingthoh watla ka jylla Meghalaya kala dap 50 snem.
U bah Arman Ula iathuh ba kine ki shnong ym tang ba kim don ka surok hynrei ki dang sahdien shibun bha khamtam haba iadei bad ki lad jingsumar, ki skul, ka bording bad ka skhim sam um.
“Haduh mynta kine ki shnong ki im daka ba rep kum u synsar bad kiwei ki mar rep hynrei kine ki shnong ki ioh kam ioh jam ruh lyngba ka skhim Mahatma Gandhi National Rural Employment Guarantee Act (MGNREGA)” la ong u bah Arman.
Haba iadei bad ka jingbym pat ioh surok ka thain, uwei naki riew tymmen naka shnong Mawmang u bah Syiem Khongsit ula iathuh ba ha ki bnai bala dep ki paidbah na ki hynriew tylli ki shnong kila kynduh ia u MP ka Rajya Sabha u Rakesh Sinha ban pan jingiarap haba iadei ba ka jingpynpoi surok noh sha kine ki shnong.
“Nga la don bynta haduh 13 sien haka ilekshon MLA bad dei namar kane nga ong ‘ban iaki MLA lajong ka dang lah ban shaniah u Rakesh Sinha ban pynioh surok hapoh kane ka thain’ namar une u MP watla udei u bar jylla hynrei u dang wan jngoh ia kane ka thain” la ong u bah Syiem.
U bah Syiem ula ong ba naka liang u Rakesh Sinha ula kular ban ai bun ki skhim pynroi kum hapoh ka shnong Mawmang, Mawshut, and Sder hynrei naka liang ki paidbah kila pynsngew sha u MP ba ka jingdonkam eh naka bynta kane ka thain kadei hi ka surok.
