Nongpoh, Risaw 8: Ka Nongpoh Town Committee (NTC) hynne ka sngi saitjain kala pynthymmai ia ki Nongialam ki ban kit ia ka lyngkor ban wanrah ia ka roi ka par bad ka khia ka shon jong ki paidbah ha ki 11 tylli ki Shnong kiba hap hapoh ka Town Dorbar.
Kine ki Nongialam ba thymmai ki kynthup ia u Bah Successful Lyngdoh uba dei u Rangbah Shnong ka Saiden kum u Chairman, u Bah Rayonald Kharkami kum u Secretary, u Bah Rexon Warjri Bah Celestine Syngkli kum u Vice Chairman, u Bah Vicky Syngkli bad u samla Anthony Suchiang kum u Assistant Secretary lem bad kiwei kiwei.
Ia kine ki nongialam ba thymmai la jied lyngba ka elekshon jied nongialam ha kaba kine ki rangbah kila jop khlem da don mano manor uh ki ban ialeh pyrshah.
Ha katei ka sngi la wan ban iadon bynta da u bah Rangkynsai Makdoh CEM bad chairman barim ka KHADC u ba la shim ruh iaka bynta kum u Chairman ka Election Committee Nongpoh Town, u bah T Nongkhlaw Secretary ka Election Committee, Bah C B Syiem Chairman barim ka Nongpoh Town Committee, u bah H Namsaw Myntri ka Hima Khadar Lyngdoh ha ryngkat bad ki Rangbah shnong bad ki secretary shnong bapher bapher.
Haba ai jingkren, u bah C B Syiem Chaiman barim ka Nongpoh Town Committee, u la ong ban long u nongialam jong ka Nongpoh Town committee kam dei ka nongkynti jongno jongno ruh, hynrei ka dei ka kamram jong baroh ki riew rangbah kiba don iaka jingbah khlieh ban wan rah iaka roi ka par ha baroh ki shnong.
Ha kajuh ka por, une u rangbah ula kitbok kit wriang ruh iaki Nongialam kiba thymmai ba kin dang iai trei shitrhem ha ka kam ba la bynshet haki haba kyntu ruh ba kin ai ka jingtrei kaba khuid kaba suba khlem ka jingnoh shylliang shano shano ruh.
