Shillong, Nailar 04: Ka Sorkar Meghalaya ka la pynbna ba ia ka tulop jong baroh ki nongtrei hapoh ka skhim VB-GRAM bad ka VB-REGLMS na ka bynta u bnai Naitung 2026, yn sa pullait hapoh kine ki ar sngi ban wan, ka ban wanrah ia ka jingmyntoi ia ki nongtrei kiba shah ktah na ka jingpynkylla iaka MGNREGA.
Katkum ka jingpynbna ba la pynmih da ka State Rural Employment Society, ia ka mang tyngka na ka bynta ka jingpyniaid kam lah dep ban ioh pdiang na ka Ministry of Rural Development, kaba pynlah ia ka jingpyllait noh mardor ïa ka tulop jong une u bnai.
Ka jingpynbeit kan bteng naduh u bnai Naitung 2026 ter ter.
U Director ka Mission, SRES, u Sibhi Chakravarthy Sadhu u la ong ba ka Jylla ka la mad ia ki katto katne ki jingeh ha kaba pynkhuid ia ka tulop, ka TA/DA bad kiwei kiwei ki jingsiew jong ka Sorkar hadien ba la weng noh ia ka MGNREGA bad la pyntreikam ia ka VB-GRAM/VB-REGLMS ha Meghalaya.
Haba kren shaphang ki jingsiew kiba dang sahteng, u Sadhu u la pynpaw ba ka tnat ka dang ïakynduh bad ka MoRD na ka bynta ban “pyllait kloi ïa baroh ki tulop, ka TA/DA bad kiwei kiwei ki bynta jong ka administrative components kiba dei ban siew haduh ka 30 tarik u Jylliew 2026” na ka bynta ki nongtrei kiba dang ïoh ïa ka jingsiew na ka bynta u bnai Iaiong-Jylliew ne Jymmang-Jylliew 2026.
U la bynrap ba lada ka Sorkar Pdeng ka dang pynslem iaka mang tyngka yyn ai katto katne ka jingpynlait pisa lyngba ki jingdon jingem jong ka Jylla,” kumjuh kumba la leh ha u snem 2025 ha kaba “ïa ka tulop jong ki nongtrei na ka bynta 1-2 bnai ruh la pynlong kum ki jingpynbeit shipor lyngba ka Sorkar Jylla.
Ka kyrwoh ka la pynshai ba “Baroh ki tulop la pynkhuid haduh u bnai Lber 2026 bad ha ki katto katne ki District haduh u bnai Iaiong 2026 bad na ka bynta ki bnai kiba dang sah, la pyrshang ban pynthikna ba ki jingsiew kin dep noh.
Ka jingpynshai ka wan ha ka por ba ka VB-GRAM bad ka VB-REGLMS ki bujli ia ka MGNREGA ha ka Jylla, ha kaba ka Sorkar ka wad ban pynbeit ia ka jingsiew bad ki rukom synshar na ka bynta ki nongtrei haki thain nongkyndong.
