Shillong, Nailar 03: Ka Sorkar Meghalaya kala pyntip ba kan pynkynriah noh ia ki nongdie jingdie madan na Laitumkhrah hapoh ka 17 tarik u Nailar, ong u Symbud Myntri Rangbah ba khmih iaka tnat Urban Affairs Bah Sniawbhalang Dhar haba pyntip ba ka Tnad kala dep ban phah notice bad la ithuh ruh iaki jaka hadien ka jingbthah jong ka Iingbishar.
“Ka jingpynkynriah kan long noh shen. Ngi la dep sam ruh iaki notice. Dei ban pynkynriah noh ia ki hapoh ka 17 tarik u Nailar. Ka don ruh ka hukum jong ka Iingbishar” ong u Bah Sniawbhalang.
U Symbud Myntri Rangbah u la ong ba ka tnat ka iatreilang bad ki nongdie dukan madan ban pynthikna baka jingpynkynriah kan iaid beit iaid ryntih.
“Ki ophisar jong nga kila don hala ka kam. Ngi dang bteng ka jingiakren nga tharai ba baroh kin long kiba bha. Kumba ka long mynta baroh ki kam ki iaid beit iaid ryntih” u la ong.
Halor ki jaka bala ithuh ha Laitumkhrah, u Bah Sniawbhalang u la ong ba la ithuh 2 tylli ki jaka.
“Ngi la ithuh ar tylli ki jaka, kawei ha ka jaka ieng kali ha Dhankheti bad kawei pat haka bynta jong ka Bungalow ha Barik. Ha ka jingshisha ka dei ka jaka kaba bha na ka bynta jong ki. Lada don ki jingbym biang ngin sa leh iaka ba donkam ban pynbiang katkum ka jingangnud jong ki nongdie jingdie madan”.
Ka Sorkar ka dang iaid shakhmat ruh ban pynkynriah iaki nongdie jingdie madan na kiwei pat ki bynta jong ka nongbah.
“Kajuh ka long ia ka Motphran. Ngi la dep pynkynriah iaki nongdie jingdie madan na Jail Road. Ngi la pynkynriah ia ki sha Polo bad ha jaka ieng kali marpyrshah ka SBI. Hadien kata, ngin sa ia kren ia ka Motphran bad ka GS Road. Na ka bynta ka GS Road ruh, ngi la ithuh ia ka jaka kaba don hajan ka jaka ieng kali ha Iewduh” ula ong.
