Shillong, Nailar 03 : U Member Secretary ka Meghalaya State Pollution Control Board (MSPCB) Bah GH Chyrmang ha ka sngi Nyngkong ula ong ba ka Board kam pat ju tip ba ka don jingiashun badno badno ruh lah katta.
Une u Heh ka MSPCB ula pynpaw ia kane tang da ki kynta hadien ka jingshah kawang petrol bomb ka Ophis ha ki arngut ki samla ba tap durkhmat hynne ka sngi.
Haba iakren bad ki nongthoh khubor, u Bah Chyrmang ula ong ba ki nongtrei kila pyntip sha u ia kane ka jingjia katba u dang don ha lynti sha Byrnihat ban leit jurip.
“Katba nga dang don ha lynti ban leit jurip sha Byrnihat, Nga la ioh pdiang ia ka phone call na ka Ophis ba kala don kane ka jingjia ba sngewsih-ba ki runar bym lah ban tip kila kawang petrol bomb ia ka Ophis” ula ong.
U Bah Chyrmang u pyntip ba mar mar hi ula wan phai noh sha Ophis bad bynrap ba katto katne na ki nongtrei kila iohi ia kine ki nongkawang petrol bomb hynrei kim shym la lah ban pynithuh ia ki namar ba kila tap durkhmat.
“Ki video CCTV ki pynti ba ki don arngut ki briew, hynrei ia ki durkhmat jong ngi la tap noh. Ngi la dep ban ujor ia ka ejahar ha Laitumkhrah Police Station” ula ong.
Kat kum ka jingtohkit bala iohlum da ka Board, ki don arngut ki briew ba suba, kiba la wan dala ki jong ki scooty bad arngut kila wan rung sha phyllaw ka ophis.
“Kat kum ka khubor ba ngi iohi, kine ki briew kila wan da artylli ki scooty. Arngut kila wan rung sha phyllaw. Ngam lah ban ong eiei palat ia kata namar ka jingtohkit ka dang iaid. Ngim don jingiashun badno badno ruh, kumta ngam tip lada ka don ne em ka jingiadei bad kano kano ka jingjia” ong u Bah Chyrmang.
Ula pyntikna ba ym shym la don mano mano ruh ba mynsaw ha kane ka jingwan thombor.
“Ia uwei u petrol bomb la kawang marjan ka kamra treikam u Senior Scientific Assistant-donbok u khlem lei lei satia” ula ong.
Une u Member Secretary ula buh jingkylli ia ka daw ha lynti kane ka jingpynlong sohpdung ia ka MSPCB.
“Balei ba pynlong sohpdung ia ka Ophis jong ngi? Ngi dei tang ki nongtrei kiba trei jar jar, ngim shym la leh eiei” ula ong.
Ki Pulit bad ka kynhun Forensic kila leit sha katei ka jaka bad kila lum ia ki sakhi satar. Ia ka ejahar la ujor ha Laitumkhrah Police Station bad ka jingtohkit mynta kala iaid shakhmat.
 Bah GH Chyrmang ha ka sngi Nyngkong ula ong ba ka Board kam pat ju tip ba ka don jingiashun badno badno ruh lah katta.){kind=link}