Shillong, Naitung 31: U nongïalam ka UDP bad Myntri barim ka tnat Tourism bah Paul Lyngdoh u la buh jingkylli ïa ka por jong ka jingpyrshah ïa ka Shillong Ropeway Project, da kaba kylli balei ka jingpyrshah ka la mih hadien arsnem shiteng ba la sdang pyntrei iaka Project.
“Mynta ba ki briew kin sngewthuh hadien ar snem shiteng baka Project ka long kaba sniew, ngam lah pei phang shuh ia ka jingmut jong kane baroh. Ngam tip satia kaei ka jingmut ba don shadien jong ka jingpyrshah,” ong u Bah Paul.
Haba kyrshan iaka projek, u Bah Paul ula ong ba la sdang ia kane ka Project da ka jingkyrpad jong ki nongshong shnong kiba la ioh ia ka jingkyrshan na u nongmihkhmat bala jied hi daki paidbah ka thain.
“Ngin ym klet ba kane ka projek ka dei ruh ka jingthmu bad jingkyrpad kaba bad daka jingkyrshan naka Raid Laban Pyllun, kaba ngi ngeit ba ka dei jong baroh ki Dorbar Shnong jong ka thain,” u la ong.
“Ïa kane ka projek la kyrshan ruh da u nongmihkhmat ba la jied daki paidbah jong kata ka thaiñ, u Bah Sanbor Shullai bad hadien ba la sdang ïa ka Project bun ngut ki mistery bad ki nongshong shnong jong ka Lawsohtun ki la ioh kam” ula bynrap.
U la ong ba kane ka project ropeway la khmih lynti ba kan ai jingmyntoi ia ki kam jngohkai pyrthei bad ia ki nongrep jong ka thain.
“Sngewskhem ba kane ka dei ka projek kan ai jingmyntoi ym tang ïa ki nongjngohkai pyrthei. Kam dei tang ban pynsuk ïa ka leit ka wan hynrei wat kito ki nongrep ruh kin lah ban kit ïa ki mar rep jong ki ha ka por kaba 3 minit naduh ki jaka rep shaduh u lum Shillong” u la ong.
U Bah Paul u la batai kane ka Project Shilong ropeway kadei kaba nyngkong eh ha ki jaka rilum jong ka ri.
“Ka rukom ba la shim ka long kaba iaryngkat bad kaba ngi don ha ki lum (Alps) haka Ri Switzerland. Bad lada ka projek kaba heh kat kata ka la don kano kano ka jingktah kaba sniew ia ki lum (Alps), ngin jin da la tip mynta,” u la ong.
Haba kren pyrshah ia ki jingshah kynthoh ha ki social media, u la ong, “Kumta, kin don beit ki nongkynthoh bad ka jingeh jong kiba bun ki briew ka long ba ki khang shwa ia ka jingmut jingpyrkhat jong ki hashuwa ban plie ia ka shyntur jong ki”.
Haba iadei bad ka jingkam ba ka Project ka ktah iaka jaka sah ki shrieh, u Bah Paul ula ong ba katei ka mat kam don jingiadei bad ka projek.
“Nga la peit ia ki jingkynthoh. Uwei u nongshong shnong u la pynpaw, ‘Nga sah ha kane ka jaka bad kine ki shrieh ki ju wan kai shaki iingsah jong ngi mynta la 15 snem.’ Kumta kumno phin buh ia ka jingkynnoh ba kane ka projek ka ktah iaka jaka sah jong ki”.
U la pynskhem shuh shuh ba baroh ki jingmynjur katkum ka ain la ioh hashuwa ban iaid shakhmat iaka Project.
“Ia kawei pa kawei ki kot ban pan jingbit la phah sha ka tnat, dei na kata ka daw ngi la ioh ia ka muhor jong ka jingmynjur naka Ministry of Forest and Environment” ula ong.
Da kaba kdew ïa ka jingdon bynta jong u President ka ri India ha ka ban plie paidbah ia u maw nongrim, u Bah Paul ong ong “Kam dei ka kam lehkai ba ka Ministry kaba kum haka ka kyrdan jong kan mynjur ïa ka jingtyrwa bad nangta ka la khot ïa iaka nongshong shnong ba nyngkong eh jong ka ri. Hato phi tharai ba ka President ka ri India kan nym wad bniah hashuwa naka kyrteng jong ka kan shah kynthup haka jingshah kynthoh hashuwa ban shah pynlehrain iaka kyrteng bad iaka kum ka President ka ri India?”.
