Shillong, Naitung 31: U Nongialam ka UDP bad Nongaibuit ka Tnad Social Welfare Bah Paul Lyngdoh ha ka sngi Thohdieng, ula pynksan ia ka jingpynkynriah ia ki nongdie madan na Khyndailad bad ong ba kane ka dei ka nuksa jong ka jingpynroi sor kaba paka, kaba ai ha ki ia ki lad ki lynti ha ka jaka ba shu kyndang.
“Nga dap da ka jingkmen namar ba nga lah long shi bynta jong ka kynhun. Nga lah lamkhmat bha ban ialeh ha ka ban pynkylluid ia ka thaiñ Khyndai Lad” ong u Bah Lyngdoh.
“Kane kadei tang shi bynta jongka jingkyntiew ia ka kam pynroi kaba salonsar ha sor, ia kaba ngim shim la shu bret ia ki briew, hynrei ngi lah pyntei ia ki jaka na ka bynta ka jongki” ula bynrap.
Katkum ka jingong u Bah Lyngdoh, ka jaka thymmai kaban shong die jingdie kadei kaba la buh ia kiba bun ki jingdonkam.
“Kitei ki jaka ki don ia kiba bun ki jingdonkam, kum ka um, bording elektrik, ki jaka leit shabar bad ki jingpynmih ki jongki. Ki nongdie ki ioh jingiada na ki riewsniew namar ba la tei bha ia kitei jaka shong die jingdie” ula ong.
Haba kren halor ka jingkynnoh halor ki jinglong jingman ka Khyndai Lad, u Bah Lyngdoh ula kdew ba kila don la ki jong ki jong ki rukom pynsngew jong ki paitbah.
“Haba ki nongdie madan kila mih noh na katei ka jaka, ki paitbah kila ong ba ka
Khyndailad kala sdang kynjah. Mynta haba la buh pat ia ki nongtem bad nongrwai, phi ong ba ka Khyndai Lad kala kylla long kaba sawa bha. Kumta kiei kita ki lad kiba phi kwah?” ula buh jingkylli.
