Shillong, Naitung 29 : U Symbud Myntri Rangbah Bah Prestone Tynsong ha ka sngi Balang ula ong ba ka Meghalaya kam lah ban shim ia ka jingkitkhlieh halor ka jingshlei um ha Assam, haba pynksan ba ka jingeh ka mih na ka jinglong ka jaka bad ki jingduna ki jingtei ba donkam ha ki jaka them.
Haba jubab ia ki jingkynnoh ba mih man ka por, u Bah Prestone ula ong ba ka Jylla Meghalaya kaba long lum, kam dei satia ka daw jong ka jingshlei um sha ki bynta ba shapoh.
“Phi donkam ban leit hi dalade bad peit. Ka jingshlei um kam shym la jia ha ki jaka lum. Ki jia ha ki jaka them” ong u Bah Prestone haba iakren bad ki nongthoh khubor.
Ula kdew ia ka jingbym biang ki nala bad ka rukom plan kum ka daw ba kongsan eh kaba wanrah ia ka jingsahkut ki nala tuid um ha ki jaka them bad ong ba ia ka rukom hap slep hi ka dei ka bym lah ban batai lypa.
“Haba phi don ha jaka them, lada ia ki nala bad ki jingtei kim dei kiba la pynwandur bha, kum kine kiei kiei kin jia” ula ong.
U Symbud Myntri Rangbah ula ong ba ka jingkynnoh ia ka Meghalaya man ka por ba shlei um ka dei ka bym iahap satia bad ban jur ia baroh artylli ki jingjia ban iashim lang ia ka jingkitkhlieh.
U Bah Prestone ula iathuh ba ki consultant ba thung da ka Jylla bad ka Sorkar Pdeng, dei ban bthah ba kin pynrung ia ki nala kiba biang bad ki culvert kiba heh ha baroh ki project ba thymmai.
“Ki consultant, la ki dei kiba thung da ka Jylla ne Sorkar Pdeng, ki hap ban pynthikna ia ka jingshna nala kiba paka, ki culvert kiba biang. Kine ki dei ban shimkhia ha ki project ki ban mih thymmai” ula ong.
