New Delhi, July 29: Ka Iingdorbar Parliament ha ka sngi Balang kala mynjur ia ki katto katne ki jingpynkylla ia ki kyndon aiñ ban tehlakam ia ka jinglait tuh ki jingkylli ne ka Anti-Paper Leak, kaban pynshitom jur ia kiba leh ia katei ka kam sniew, kan pynlyngkot ia ka por tohkit bad ban pynthikna ia ka jingai bishar kaba kloi, kum ka jingpyrshang ban wanrah pat ia ka jingshaniah ki samla kiba wadkam bad kiba ialeh ia ki eksamin ki bapher bapher hadien ba kala mih ka kynrum kynram kaba la ktah jur ia kaba iadei bad ka jingpynrungkam pynrungjam ha kylleng ki bynta jong ka ri ha kine ki khyndiat bnai kiba la dep.
Da kaba ai jingmynjur da kaba jingsngap ia ka sur ne Voice Vote hadien ba kala don ka jingiatai kaba khluid bha, ka Public Examinations (Prevention of Unfair Means) Amendment Bill, 2026 kala ai shuh shuh ia ki bniat ban pynjur ia ka jingsiew ia ka jingshah daiñ kuna bad ia ki jingpynsajia, ban pynduna ia ka por jong ka jingtohkit bad ban pynkloi ia ki case kiba iadei bad ka jinglait tuh ki jingkylli bad ia ka jingiasylla ban leh tuh ia ki eksamin.
Ha katei ka ain kaba la wanrah ia ki jingpynkylla kala pynkup bor ba ia ki jingtohkit halor ka jinglait tuh ki jingkylli dei ban pyndep hapoh jong ka 2 bnai. Ki Jylla bad ki Union Territory kin hap ban thung kyrpang ia ka Special Fast Track Courts kiba donkam ban shimkhia ia kitei ki jingjia man la ka por. Kane ka Bill ka ailad ruh ban thung ia ki Special Public Prosecutors bad batai ia ka por kaba la buh ban ujor bad ban pynsted ia baroh ki kam ki jam.
Uno uno uba la shem ba ula leh bakla un mad ia ka jingshah set phatok kaba 5 haduh 10 snem, nalor kane bad ka jingsiew ia ka jingdain kuna kaba kot haduh T.50 lak. Ki jingiasylla da ki kynhun kiba donkti ha ka jinglait tuh ki jingkylli ne ban leh tuh ia ki eksamin kin mad ia ka jingsiew ia ka jingdain kuna kaba kot haduh T.10 Klur, lada lap ba kiba ai jingshakri (Service Provider) ne ki jaka pule (Institutions) kila donkti ha kaban leh thok kin shah pynsajia da kaba siew ia ka jingdain kuna kaba kot T.5 Klur bad ban khang shi syndon ia ki ban pynlong ia kino kino ki eksamin haduh 8 snem, naduh ka jingpyrkhing kaba la don lypa kaba long 4 snem.
Haba jubab ha ka jingiatainia, u Myntri ka Sorkar Pdeng u Jitendra Singh ula ong, ba kitei ki jingpynkylla ki dei da ka jingthmu ban pynthikna ia ka jingpynkloi bad ban tehlakam ia ka jingsniew na ka jinglait tuh ki jingkylli eksamin lyngba ki kyndon ain kiba pyrkhing bha. Ki dkhot ka Liang Pyrshah ruh kila ai jingkyrshan ba dei ban leh da kaba tyngeh lyngba ki kyndon ain pyrshah ia ki jinglehtuh hynrei kila pynpaw pat ba tang ka jingthaw ain kan ym lah satia ban shimkhia naduh tyllong ia kane ka mat kaba la ktah ia ka ri ha ka rukom pyniaid ia ki eksamin.
Kane ka Bill kala wan ha ka por kaba kongsan bha hadien ba kala mih ka jingjia kaba iadei bad ka NEET (UG) 2026 examination, kaba mynta kala lam syndon sha ka jingshah khmih bniah, ka jingpynbitar ia ki lak ngut ki samla pule kiba don ia ka jingthrang ban ioh ia ki admission ha ki jingpule.
Dang ha kine ki taiew, ka CBI kala aiti ia ka chargesheet kaba nyngkong halor kaj inglait tuh ki jingkylli jong ka eksamin NEET-UG 2026 pyrshah ia ki 13 ngut ki riewshimet hapoh jongka Public Examinations (Prevention of Unfair Means) Act, 2024, ryngkat bad kiwei pat ki kyndon ain.
Kane ka jingpynkylla ia ki kyndon ain, kadei kaba la khmih lynti ba kan ktah wat ia ki samla pule jong ka thain shatei lammihngi, ha kaba da ki phew hajar ngut ki samla kiba don ia ka jingangnud ki iakhun man la ka snem ia ki eksamin ha ka ri kum ka NEET, CUET, JEE, SSC bad ki eksmain ban shah thungkam ha ki ophis jong ka Sorkar Pdeng. Ka Sorkar Pdeng kala pynpaw ba kane ka jingpynkhlain shuh shuh ia kane ka ain kadei da ka jingthmu ban ai kloi ia ka jingbishar kaba hok bad ban leh da kaba tyngeh pyrshah ia kito kiba donkti ha kaban leh tuh ne leh thok ia ki eksamin.
Ia kane ka Bill mynta yn sa rah sha Rajya Sabha na ka bynta ban ioh ia ka jingmynjur.
