Shillong, Naitung 29 : Namar ka jingsngewkhia ia ka jingnang jur ki jingjia aksiden kali, ka Sorkar Jylla kala bthah iaki bor district ba kin nang pynkhlain ia ki jingtreikam ban tehlakam ia ka jingniah kali khlemakor.
U Symbud Myntri Rangbah ba khmih ia ka kam Pohiing (Police) Bah Prestone Tynsong ula pyntip ba ka Tnad kala ai ia ka jingbthah kaba shai sha ki Deputy Commissioner bad Superintendent of Police ba kin shim ia ki sienjam ba tyngeh ban the lakam ia ka rukom niah kali khlem akor kiba iohi ha kylleng ka Jylla.
“Ngi la bthah ia ki bor district, ki DC bad SP, ba kin nang pyrshang shuh shuh ban pynthikna ba ki jingniah kali khlem akor ba ngi iohi man ka sngi, man ka taiew bad man u bnai kim dei ban jia shuh” ong u Bah Prestone haba iakren bad ki nongthoh khubor ha ka sngi Balang.
Ula pynpaw ba ki jingiada ia ki aksiden kali ka shong eh ha ka jingpyni kam jong ki bor district.
“Ka jingiada ia ki aksiden kali ka shong eh halor ka jingtreikam ba man ka sngi jong ki bor district. Nga thikna ba da ka jing trei shitom, ngin sa lah ban pynduna ia kum kine ki jingjia kiba sngewsih” ula ong.
