Shillong, Naitung 29: Ka Sorkar Meghalaya ka la kyrpad ia ki nongdie madan bad kiba don bynta ha kane ka kam ba kin kyrshan ia ka jingthmu ka Sorkar ban pynkynriah ia ki nongdie madan sha ki jaka bala ithuh kyrpang, ha kaba u Symbud Myntri Rangbah ka Jylla u Bah Prestone Tynsong u la ban jur ba ka jingpynkynriah kam dei ka jingleh donbor ne ka jingbeh noh iaki.
Haba kren sha ki lad pathai khubor u Bah Prestone u la ong ba kane ka jingthmu ka long ban pynduna ia ka jingkhapngiah ha ka sor Shillong bad ban pynthikna ia ka jingsuk haka leit ka wan ki paidbah baroh shisngi.
“Nga kyrpad ia baroh kiba don bynta ban iatreilang bad ka Sorkar. Kane ka jingthmu ka long kaba kongsan bha ia ngi. Ngim beh iano iano. Ngi shu pynkynriah ia ki sha ki jaka ba la buh kyrpang, bad yn siew ruh iaka bai kynriah shaki jaka bala ithuh kyrpang” la ong Bah Prestone.
U Bah Prestone ula bynrap ba ka jingthmu ba kongsan jong ka Sorkar ka long ban thaw ïa ka jaka sor kaba kham ryntih bad katba kylluid daka ba buh ruh hakhmat ban iada iaka kamai kajih jong ki nongdie madan.
“Ngi kwah ba ki paidbah kin suk, ha ka por mynsngi bad mynmiet. Dei na kata ka daw ba nga kyntu ia baroh ban iatreilang,” u la ong.
Haba jubab ia ki jingkynthoh na ki katto katne ki kynhun, u Symbud Myntri Rangbah ula pynshai ia ka nongrim jong ka Sorkar.
“Nga la iohi ba ki don ki briew kiba kylli balei ka Sorkar ka beh noh ia ki. Kata kam dei satia. Kane ka dei shaphang ka jingpynkynriah sha kiwei pat ki jaka, ym ka jingbeh noh syndon iaki. Yn pynkynriah ia ki nongdie madan sha ki jaka kiba biang, bad yn ai jingiarap pisa na ka bynta ban pynkynriah shaki jaka thymmai” ula ong.
