Plie u DyCM ia ka portal ka EKH ban pynkloi ka jingshakri i’u paidbah

Shillong, Naitung 29 : U Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Balang, ula pynlait paidbah ia ka District-Level Grievance Redressal Portal ha East Khasi Hills, ka ban pynsuk ia ki paidbah ba kin buh iaki jingujor bad buddien ia ki rai bala shim.

Kane ka portal ka dei kaba la maitphang da ka bor district ka East Khasi Hills.

“Kane ka dei ka sienjam ba thymmai bala shim da u Deputy Commissioner bad ngi la sdang ia kane na East Khasi Hills. Nga thikna ba kiwei ruh ki district kin sa leh lang kumjuh” ong u Bah Prestone.

Ula ong ba ka jingthmu jong ka portal ka long ban pynlong ia ki bor pyniaid ka district ba kin treikam bha bad ba lah ban ai ka jingshakri sha ki paidbah ha man ki jaka.

“Ka jingthmu jong ka Sorkar hi ka long kaba shai. Ngi kwah ban poi sha man ki nongshongshnong ka Jylla, bad ban leh eiei ia ka jingeh ba ki don, la ka dei ka jingeh shimet, lane jong ki shnong ne ka thain” ong u Symbud Myntri Rangbah.

Haba kren halor ki jingpyrshang ba dang iaid ban sam lem ia ka bor ai jingshakri, u Bah Prestone ula kdew ia ki sienjam ba dang shen kum ka jingailad ban aplai lisen niah kali na ka ophis u BDO ka ban iatreilang bad ka Ophis ki DTO.

“Ngi kwah mynta ban wanrah ia ka Sorkar sha ki jingkhang iing jong ki nongshongshnong ka Jylla. Dang shen ngi la sdang ia ka DTO, ngi la bthah ia ki ba wat ka jingai lisen niah kali lah ban ioh n aka ophis ki BDO” ula ong.

Haba pynpaw ba watla ki tnad bapher bapher kila don ia ki rynsan ai jingshakri online, u Bah Prestone ula ong ba ki district ki mad ia ka jingeh ba kham pher haba phai sha ki jingeh u paidbah. Kane ka portal ba thymmai ka dei ban weng ia kane ka jingduna.

Haba kylli halor ki jingpynshitom ia ki nongtrei kiba lehtam, u Bah Prestone ula ong ba ka Right to Public Services Act kala dep kren ia ki kyndon ai jingshakri bad ki jingpynsajia.