Shillong, Naitung 29: Ka Hynniewtrep Youth Council kala kyntu ia u Lat ka jylla Meghalaya ban tuklar mardor ha kaba iadei bad ka jingthung ia u Acting Vice-Chancellor jongka North-Eastern Hill University, namar ba ka Sorkar Pdeng kala pynmih ia ka hukum kaba la long pyrshah ia ki aiñ jong ka skulbah.
Ha ka jingthoh kaba la phah sha u Lat ka Jylla bad u Chief Rector ka NEHU u CH Vijayashankar ha ka sngi Balang, ka HYC kala buh jingkylli ba kumno ka Ministry of Education kala pynmih ia ka hukum ha ka 22 tarik u Naitung ban pynkhamti ia ka kam VC ha u Prof Saroj Kanta Barik, da kaba pynpaw ba udei uba wan baar ha ka kyrdan jong ki nonghikai kiba la rangbah tam ha ka skulbah, hadien ba ka samoi treikam jong u VC uba rim kala kut noh.
Ka Council kala pynpaw ba katei ka jingshim rai kala long pyrshah ia ka Statute 2(A) Clause (2) jong ka NEHU Statutes, 2013, kaba kdew shai ba ia ka kam dei ban pynkhamti ha u nonghikai uba la rangbah tam ha ka kam, haba kam pat don satia kano kano ka jingthungkam kam kaba pura.
Katkum ka jingong ka HYC, ka statute ka long kaba tehpyrkhing bad kam lah ban pdiang da kumwei pat tad lada u nonghikai uba la rangbah tam ym lait, um long uba bit ba biang ne um long uba kloi ban shimti ia ka kam.
Ha katei ka dorkhas, la ong ba ka shithi jong ka Ministry kam shim la kdew eiei ia kano kano ka jingjia bad kam shim la tyrwa ruh ia kino kino ki bynta kiba iadei bad ka ain ka kanun ia uban shim hadien ia ka kam.
“Ki Statutes kiba la thaw hapoh jong ka NEHU Act ki don ia ka bor jong ka ain. Kano kano ka jingshim rai ki bor pyniaid kam lah pat ban iaid lait ia katei ka kyndon ain kaba la kdew” la ong ka HYC.
Ka HYC kala pynpaw ba ka NEHU ka lah dep ban iaid lyngba ia ki por jong ka jingbym biang ia ka rukom pyniaid bad ong ba ka long bha kaba kongsan ba kano kano ka jingthungkam kaba nangne shakhmat kadei ban bud ryntih ia ki kyndon ain bad pynneh ia ka jinglong ba kyrpang bad ban ioh ia ka jingshaniah na ki paitbah.
Ka HYC kala kyntu ia u Lat ba un shimkhia lang ia kane ka mat bad ka President ka India kaba long ka Visitor bad ruh bad ka Ministry of Education.
Kala pynpaw ba dei ban pynbeit biang ia ka hukum kaba la pynmih ha ka 22 tarik u Naitung, da kaba bud ryntih ia ka Statute 2(A)(2) bad ban pynthikna ba kino kino ki rai kiba la shim da ki bor pyniaid ka NEHU nangne shakhmat kidei ban bud ryntih ia ki kyndon ain bad ia ki Statutes.
Ka Council kala pynpaw ba ka rukom trei ia ka kam kadei ban iaid ha ka lynti kaba khuid ba suba kaban btin da ki kyndon ain ia ka rukom pyniaid kam ia ka skulbah bad kano kano ka jingleh kiar, wat la kadei kaba la kdew shai bha, kan pyntroin ia ka bor treikam jong ka skulbah bad ban khring ruh ia ki jingeh ha kaba iadei bad ki ain ki kanun.
