Shillong, Naitung 29 : U Symbud Myntri Rangbah Bah Prestone Tynsong ha ka sngi Balang ula ong ba ka Sorkar India kala ai ka jingkular ia ka kynhun na Meghalaya ba kan sa pynkylla ia ki kyndon bala tyrwa ha ka FCRA Amendment Bill kiba ktah ia ka jingtreikam ki Balang ha ka thain Shatei Lam Mihngi khamtam ha Meghalaya.
Haba kren sha ki nongthoh khubor, u Bah Prestone ula ong ba u Myntri Rangbah Conrad K Sangma ula ialam dang shen ia ka kynhun ki nongialam Balang sha Delhi ban iakynduh ia ki nongialam ka Sorkar Pdeng halor kane ka kam.
“U CM ula ialam ia ka kynhun sha Delhi bad iakynduh ia katto katne ki nongialam jong ka Sorkar Pdeng. Kila kular ia ka kynhun ba kin sa pynkylla ia ki kyndon jong ka amendment bill kiba ktah ia ka jingtreikam ki balang ha ka thain Shatei Lam Mihngi khamtam ha Meghalaya” ong u Bah Prestone.
Hynrei ula pynpaw pat ba um pat don jingtip ia mynta la ka Sorkar pdeng kala wanrah ne em ia ka jingpynkylla.
“Ia mynta hi ngam pat tip la kala pynkylla ne em ia ka amendment. Kumta ngam lah ban ong eiei” ula ong.
Haba pynshai ia ka jingtreikam jong kane ka ain, u Bah Prestone ula ong ba ka FCRA kam treikam satia tang ia ki jaka treikam jong ki Khristan.
“Peit shane, ka FCRA kam mut ba dei tang ia ki Khristan. Phi hap ban sngewthuh ia kata. Ka FCRA ka dei ia ki seng bapher bapher. Ka treikam ha baroh kawei ka ri” ula ong.
“Ka jingsngewkhia jong ngi hi ka long ha ka liang ki Khristan bad ngi la dep pynsngew ia kaneka jingeh bad ngi la dep tyrwa ruh ia ka jingpynkylla. Kumba nga ong, nga dang ban ioh ia ka jingtip la ia ki kyndon ba ngi la aiti sha ka Sorkar India la dep mynjur ne em. Tad hadien ba nga la ioh jingtip, ngam pat lah ban iathuh eiei ia phi”.
Halor ka jingkylli la ka Sorkar Jylla kan pyrshah ia ka bill, u Bah Prestone ula pynpaw ba ka dang kloi palat ban shim ia ka nongrim halor kane.
