Shillong, Naitung 29 : Ka Sorkar Jylla kala pynmih ia ka hukum ba bthah ia ki Tnad bapher bapher ba kim bit ban pynkup burom ia u Myntri Rangbah, Symbud Myntri Rangbah, Myntri Sorkar ne ki Ophisar ha kino kino ki jingialang Sorkar.
Ia kane ka hukum la pynmih da ka Secretary ka Tnad Personnel & AR (A) Kong Isawanda Laloo ha ka sngi Balang.
Hynrei kala ong pat ba ia kane lah ban pynlait noh tang ha ka khep ba khot ia ki Myntri ka Sorkar Pdeng lane ki Heh nabar Ri ban iashimbynta ha ki jingialang Sorkar.
Ka ong, ba naduh mynta, ha ka jaka kane, ki Tnad ki dei ban pynkup burom ia arngut lane lai ngut na ki riew paidbah ha kum kine ki jingialang bad lada ki i iahap, ki lah ban ai ia ka lad ba kin ai jingkren katto katne minit ha ka jingialang.
La bthah ia baroh ki Tnad ba kin pyntreikam pyrrkhing bha ia kane ka jingbthah.
