Shillong, Naitung 29 : Ka Sorkar Jylla kala tyrwa ba ka Sorkar Pdeng kan shu thied ia ki jaka hapoh ka 150 yard na khappud ka India-Bangladesh khnang ban lah pyniaid sted noh ia ka jingker sainar bad ban ai jingiada ia ki nongshongshnong ha khappud, ong u Symbud Myntri Rangbah Bah Prestone Tynsong ha ka sngi Balang.
Haba kren sha ki lad pathai khubor, u Bah Prestone, uba bat ia ka tnad kam pohiing (police), ula kdew ia ki shnong ha ki jaka kum ka thain Pynursla kaba don tang 50-60 meter na u mawpud. Hapoh ki kyndon ba don mynta, ka jingkersainar ka dei ban long 150 yard shapoh u pud ka India.
“Lada ngi bud beit thik ia ka kyndon 150 yard, bun ki shnong kin hap shabar ka jingker. Kane kan pynlong ia ki ban hap hapoh ka no man’s land” ong u Bah Prestone.
“Ngim pyrshah ia ka jingker sainar. Ngi donkam ia ka. Hynrei ngim lah ban shu ieh ia ki briew jong ngi ba kin nym ioh ia kino kino ki jingiada”.
Ban weng ia kane ka jingeh, ka Sorkar Jylla kala thoh sha ka Ministry of Home Affairs bad pynlong ruh ia ka jingiakren bad ki shipai BSF lem bad ka NBCC, ula bynrap.
U Bah Prestone ula ong ba ka Sorkar Meghalaya kala ai jingmut ia kiwei pat ki lynti.
“Lada ym lah ban pynjynsur ia ka 150 yard, ka Sorkar India ka dei ban shu thied ia ki jaka khnang ba yn lah ban pynkynriah ia ki nongshongshnong bad ki nongrep sha ki jaka kiba shngain”.
Ka jingtyrwa, u pynpaw, kan pynbiang tarajur ia ka jingdonkam ban wanrah ia ka jingshngain ka ri bad ka kamai jakpoh lem bad ka jingshngain ki briew kiba sah ha khappud.
