Leit mudui ka Bar Association sha ka Chief Justice
Shillong, Naitung 29 : Uwei u nongiasaid ain ba shah kynnoh jrong kti ia kawei ka Intern, ula shah pyn iaid kjat ha ryngkat ka bat skhor ha nongbah Shillong, kumba la paw na ka video kaba la saphriang paidbah.
Hadien kane ka jingjia, ka State Bar Association kala pyntip ia kane ka jingjia sha ka Chief Justice ka Iingkashari Meghalaya High Court halor ka rukom shah pynjah burom une u nongiasaid ain.
Ia kane ka jingjia la dep ban pyntip da ka jingthoh sha ka Chief Justice, ong ka khubor ba iajan bad ki nongiasaid ain.
Kane ka jingjia kala paw pyrthei hadien ba kane ka Intern kala leit ujor da ka ejahar ha Sadar Police Station ba kynnoh ba ka shah jrong kti ha une u nongiasaid ain, uba la tyrwa ia ka da ka pisa ba kan sngap jar ia kaei kaba jia.
Ki dkhot ka seng Hynniewtrep National Youth Front (HNYF) kala leh ia kane ka kam hadien bala dep ban ujor ia ka ejahar.
