Shillong, Naitung 24 : U Symbud Myntri Rangbah Bah Sniawbhalang Dhar ha ka sngi Thohdieng, ula pynbna ba ka Sorkar Jylla ka don jingthmu ban ai jingiarap song pisa sha palat 2 lak ngut ki nongrep ha kylleng ka Jylla hapoh kane ka samoi synshar ka Sorkar MDA.
Haba kren na ka rynsan ialap elekshon shiteng samoi ka Shillong Lok Sabha na ka bynta u kyrtong ka NPP Dr DRL Nonglait kaba long ha Patharkhmah, u Bah Sniawbha ula ong ba ia kane ka sienjam lah dep ban iakren bad u Myntri Rangbah ka Jylla Conrad K Sangma bad yn sa pyntreikam ia ka lyngba ki seng jong ki nongrep bad ki nongtrei ka party.
“Nga la iashong jingialang bad u Myntri Rangbah hynnin ka sngi. Ula bthah ia nga ban pyntip sha ki nongtrei ka party bad ki seng nongrep ba ngin pyrshang ha kaban pynkhreh ia ka jingiarap song pisa haduh 2 lak ngut ki nongrep ha kane ka samoi treikam” ong u Bah Sniawbha.
Kat kum ka jingong jong u, kane ka jingiarap song pisa kan long hapdeng T.5000 haduh T.7000 ia man ki nongrep.
“Katto katne kin ioh T.5000, katto katne kin ioh T.6000 bad T.7000. Kane ka jingiarap song pisa ka dei kaba thmu ban ai ha ki ia ka bor ban pynheh ia ka kam rep bad kiwei kiwei ki kam” ula bynrap.
U Bah Sniawbha ula kren ruh halor ki kam ba ka Sorkar kala leh ha ki jaka khappud, haba pynpaw ba kane ka Sorkar ba mynta ala shim ia ki sienjam kaba kiwei pat ki Sorkar bala leit kim shym la leh eiei.
“Phi dalade phi iatip bha ia kaei kaba ka Sorkar kala leh haba iadei bad ki jaka khappud. Ym pat ju don ki Sorkar bala leit kiba nud ban shimrai na ka bynta ka jingsuk bad ka bha ka miat ki briew jong ngi ha khappud” ula ong.
Ula pynshai ruh ia ki khubor kiba kynnoh duhei ia ki jaka, da kaba ong ba ka Sorkar kala leit iuhkjat ha baroh ki jaka khappud ban pynthikna ba ki nongshongshnong ki im ha ka jingsuk bad jingsngain.
