Kyntu ka Dr Chandee ia ka Sorkar Pdeng ban shah skhor ia ka jingsngewkhia ki samla halor ka NEET

Shillong, July 24: Ka MLA jong ka Gambegre ka Mehtab Chandee Sangma kala kyntu ba dei ban aipor ban sngap bad shah shkor ia ka jingpynsngew ki samla pule ha kaba iadei bad ka jingkynnoh ba ki don ki jingdkoh jong ka National Eligibility-cum-Entrance Test (NEET) bad ong ba ia ka jingeh ka jongki dei ban shimkhia.

Haba iakren bad ki nongthoh khubor ha ka sngi Thohdieng, ka Sangma kala ong ba kam dei satia ka briew kaba iahap ban kren eiei na ka bynta ka Sorkar Pdeng ha ka rukom shimkhia ia katei ka mat hynrei kala kubur pat ba ki jingsngewkhia kiba la pynpaw da ki samla ki long kiba don nongrim.

“Ka long pat ka mat kaba don nongrim shisha” kala ong bad ka bynrap “Ngi dei ban don ia ka jingsngewlem bad ka jingshah shkor bha ia ka jingpynsngew jong ki samla ha kylleng ka ri namar ba kidei shi bynta jong ka imlang sahlang ka jong ngi bad kidei ruh jong ka pateng ban wan”.

Haba jubab ia ki jingkylli, ba kala don ka jingiuhroit ia ka jingthmu jong ka NEET, ka Sangma kala ong ba la wanrah ia ka eksamin ban pdiang admission ne jaka pule ha ka lynti kaba khuid ba suba bad ban pynbeit ryntih ia ka rukom bhah ia ki Seat.

“Ka dawbah jong ka jingwanrah ia ka NEET ka long ban pynsuk ia ka rukom bhah ia ki Seat bad ba kan don ruh ka jingkhuid jingsuba ha kaba iadei bad ka jingbhah ia ki Seat” kala ong.

Kala pynpaw ba kane ka jinglong jingman kaba mynta kam dei satia ka jingjia kaba tang mynta, ka Mehtab Chandee Sangma kala ong, ba ki lah don kum kitei ki jingjia ha ki por kiba lah dep, kaba pyni ia ka jingduna ha ka rukom treikam, kaba donkam ban shimkhia bha.

“Kam dei ka jingjia kaba la jia ha ka sien kaba nyngkong. Kila don ruh ki jingjia ha ki por kiba la dep, kaba mut eiei, ha kaba hangno re hangno donkam ban khmih bniah bad ban shimkhia bha. Lada ngi lah ban tih jylliew bha bad ban peit haei ngi lah iaid bakla, kumta nga tharai ngin lah ban shimkhia thikna bha” kala bynrap.