Iasnohkti ka KSU bad ki jingiakhih ki samla pule ha Delhi | Iakhih ki Unit ha ki skulbah ka Jylla

Shillong, Naitung 24 : Ka Khasi Students Union (KSU) kala iasnohkti lang bad ka jingiakhih jong ki samla pule ha Delhi, da ka jingmih ki Unit bapher bapher ha ki skulbah ha Jylla ban iakhih ha ka sngi Thohdieng hala ki jong ki jong ki jaka pule.

Kine ki Unit ka KSU ba pynlong ia ka jingiakhih ki kynthup ia ka NEHU Unit, Shillong, ka USTM Unit bad RIST Unit ha Ri-Bhoi, ka NEIAH Unit, Shillong bad ka MGU Unit, Ri-Bhoi.

“Kum ka dak ka jingsngew khia halor ka jingiakhih ha nongbah Delhi na bynta ka jingkhuid jingsuba ka pule puthi ha ki eksamin bapher bapher bad ruh shi bynta ban dawa ban hiar shuki u Myntri ka tnat pule puthi ka sorkar pdeng u Dharmendra Pradhan, Ka KSU lyngba ki shnat treikam ba don ha ki skulbah hapoh ka jylla ki la pynlong iaka jingiakhih ha la ki jong ki jong ki skulbah” ong ka kyrwoh na ka KSU.

Kum ka dak ka jingsngewlem ia ka mynsiem ki 20 ngut ki samla pule kiba la shim iala ka jingim halor ka jinglait tuh ki jingkylli eksam NEET, ki Unit ka KSU kila pynlong ruh ia ka jingsngap jar bas hi minit bad ka jingthang mombati kum ka jingsngewlem ia kiba haiing hasem jong kine ki samla.

Ka seng ha ki khyndiat sngi lyngba ka shnat treikam ba don ha nongbah Delhi, ka la leit iashim bynta shitrhem ban iakhih bad ai ka jingkyrshan ha kane ka jingiakhih kaba mynta ba dang bteng ha Jantar Mantar Delhi.

Ka KSU ka pynrem jur ia ka jingpyndonkam da ka bor kaba ishyrkhei, kaba palat pud bad kaba pyrshah ia ki kyndon ain da ki Pulit pyrshah ia ki samla pule kiba iakhih jai jai ha New Delhi ha ka 20 tarik Naitung, 2026.

“ Ka jingbom jingtied (lathi charge), ka jingpyndonkam da ka lyer pynsat khmat (tear gas), bad ka jingkynnoh ba la pyndonkam ruh ïa ki briew ba phong jaiñ pulit hynrei kiba rah lathi ban shoh ïa ki samla pule kiba khlem pyni kano kano ka jingïakhun pyrshah, ka long ka jingpynkheiñ kaba shai ïa ki nongrim ka synshar paidbah, ka jingïaid beit katkum ka aiñ (Rule of Law), bad ïa ki hok ba la pynskhem hapoh ka Article 19(1)(a) bad Article 19(1)(b) jong ka Riti Synshar ka Ri India, kiba ai hok ïa ki nongshong shnong ban pynpaw ïa la ka jingmut bad ban ïalum paidbah da ka lynti kaba jai jai. Kum kine ki jingleh kim long tang kiba ym lah ban pdiang, hynrei ka pyni iaka jingleh donbor kane ka Sorkar” ong ka KSU.

Ka KSU ka pynrem jur ïa ka Sorkar India namar ka jingbym lah jong ka ban pyni ïa ka jingsngewlem, ka jingkitkhlieh kaba don jingkitkhlieh halor katei ka mat kaba ktah beit ïa ka lawei jong ki lak ngut ki samla pule bad ki nongïakhun eksamin ha ka ri.

“Ha ka jaka ban pynlong ïa ka jingïakren kaba seisoh bad ban wad ïa ki lad jingïasuk, ki bor synshar ki la jied ban jubab da ka jingpyndonkam bor bad ka jingpynsyrtok, kaba long pyrshah ïa ka mynsiem jong ka synshar paidbah bad ka Riti Synshar ka Ri” kala ong.

Ki jingdawa ba la rah da ki samla pule, kynthup ïa ka jinglait tuh bun sien ki jingkylli jong ki competitive examination, ka jingdonkam ban pynkhlaiñ ïa ka jingshai (transparency), ka jingkitkhlieh (accountability), ka jingbishar hok (fairness), bad ka jingïaineh (integrity) ha ki rukom thungkam bad pynlong eksamin, ki long kiba dei hok, kiba shong nongrim ha ka aiñ bad kiba dei ban ïoh ïa ka jingpyrkhat kaba kyrkieh na ka Sorkar.

“Ym lah satia ban ailad ba ka jingtrei shitom, ka jingangnud bad ka lawei jong ki lak ngut ki samla kin shah pynjulor namar ka jingbymbiang ha ka rukom synshar, ka bamsap ne ka jingbymkitkhlieh jong ki bor ba dei peit” kala ong.

Ka KSU ka ïeng skhem ha syndah jong baroh ki samla pule kiba la shah ktah ha kane ka jingjia bad ka pynpaw ïa ka jingkyrshan kaba pura ïa ka jingïakhun jong ki na ka bynta ka hok. Ka seng ka pynpaw ruh ïa ka jingsngewlem kaba khraw ïa kito kiba la mynsaw ha ka jingthombor jong ki Pulit bad khmih lynti ba kin ïoh jingïakhiah noh kloi bad pura.