Shillong, Naitung 23: Ka Hynniewtrep Youth Council (HYC) ka la dawa na ka Meghalaya BJP ba kan ai jingpynshitom ia u President ka Youth Wing haba kyntu ruh ia ki pulit ba kin khmih bniah la ki jingkren jong u ki long ne em kiba donkam ban shah pynshitom katkum ki kyndon ain.
U president ka HYC Bah Roykupar Synrem u la ong ba ki jingkren jong u nongialam ka BJP pyrshah ia ki nongiakhih ha Jantar Mantar, New Delhi, ki long ki bym don jingkitkhlieh bad ki bym iahap bad uno uno uba don ha ka kyrdan mihkhmat paidbah.
“U dei u briew uba la nang la stad. U la dei ban ai ia ka jingkren jong u ha ka rukom kaba don ka jingkitkhlieh,” ong u bah Roy.
U la pynksan ia ki nongiakhih kiba dang iakhih ha Delhi haka ba kdew ba iaki nongiakhih la iada daka riti synshar ka ri India.
“Ha ka synshar paidbah, baroh ki don ia ka hok ban iakhih. Ka riti synshar ka ri India ka la ai ia ngi ia kata ka hok ban iakhih, ka hok ban ialum paidbah, bad ka hok ban kren bad pynpaw pyrthei daka jinglaitluid. Tang namar ba ngi iakhih, kam mut ba ngi pyrshah ia ka Sorkar,” u la ong.
U Bah Roy u la pyrshah ia ka jingkren u nongialam ka BJP Youth Wing kaba u la batai ba ka jingkren jong u ka thmu ban ithuh ia ki nongiakhih kum ki nongshun ka ri.
“Phim lah ban pyntieng ia ngi namar ba ngi pyni ia ka jingbym iahap jingmut. Ha ka synshar paidbah ngi don ka hok baroh ban pyni ia ka jingbym iahap jingmut. Kam mut ba phi khein ia ngi kum ki nongshun ka ri, ban khien ia ngi kum ki lehnoh ne ki kaikhlaw” u la pynpaw.
“Ngi pynrem jur ia une u briew ka BJP” u la bynrap. Ka HYC ka dawa naka Meghalaya BJP ba kan pynshitom pyrshah ia u nongialam ka BJP Youth Wing.
“Ngi la dawa na ka Meghalaya BJP ba dei ban leh eiei pyrshah ia kum une u briew,” ong u bah Roy.
U la kyntu ruh iaki bor ka ain ban leh eiei.
“Kumjuh ruh sha ki bor jong ka ain ha ka jylla, ba ki hap ban peit la ka don ne em kano kano ka ain ban pyngat ia u hapoh ka ain,” la ong u president ka HYC.
