Shillong, Naitung 23 : U Myntri Rangbah ka Jylla Conrad K Sangma ha ka sngi Palei ula ong ba ka Sorkar Jylla ka dang bat skhem ia ka jingkular ban khmih ia ka jingbit jingbiang jong ki nongtrei lajong, da ka jingiasoi ia ka Memorandum of Understanding (MoU) bala pynthymmai hapdeng ka Sorkar Jylla bad ka State Bank of India (SBI) ban pynkhlain ia ka State Government Salary Package (SGSP) ne ka song tulop ka Sorkar Jylla.
Kane ka soskular ba thymmai kan bujli noh ia ka MoU bala iasoi ha u snem 2012 bad kala nang pynbun ia ki jingioh jing shakri bad ki jingmyntoi ha ka lain pisa tyngka na ka Bank, kaban ioh da ki nongtrei Sorkar.
Witnessed the signing of the revised Memorandum of Understanding between the Government of Meghalaya and the State Bank of India for the State Government Salary Package (SGSP), reaffirming our commitment to the welfare of our Government employees.
The revised agreement… pic.twitter.com/yHKXGXkIVl
— Conrad K Sangma (@SangmaConrad) July 23, 2026
Kane kan treikam ia ki nongtrei kiba don ia ka SGSP Account bad kumjuh ruh kito ki nongtrei kiba dang shu thungkam thymmai.
Kat kum kane ka soskular ba thymmai, ka SBI kan ai ia ki jingmyntoi bala nang pynbun, kynthup ka Insurance ba heh, ka jingpynjynsur haba shim ram, ki jingbun ki jingai shakri lyngba ka digital banking, ki jingmyntoi ba ai ki bank ia ki bahaiing hasem, bad kiwei kiwei.
Haba kren ha ka jingialang, u Myntri Rangbah Conrad K Sangma ula ong ba ka Sorkar ka kut jingmut hok sha ka bha ka miat jong ki nongtrei da kaba pynthikna ba kin ioh ia ki jingshakri ba kham bha na ki bank. Ula pynpaw ba kane ka jingiatehlok ba la pynthymmai ka pyni ia ka jingpyrshang ba khlem sangeh jong ka Sorkar ban nang pynbha ia ka jingai jingshakri ba lah ban ioh da ki nongtrei haba kyntiew ia ka jingiadon bynta lang ha ka kam pisa pilain bad digital banking ha baroh kawei ka Jylla.
Kat haduh ka 30 tarik Jylliew, 2026, palat ia ka 43,000 ngut ki nongtrei Sorkar ki don ia ka account tulop bad ka SBI hapoh ka SGSP, kaba kot jan 71% ha ka jingdon ki nongtrei ka Sorkar Jylla. Na kine, palat 33,000 ngut ki nongtrei kila ioh shim ia ki ram bapher bapher na ka bank, kaba pyni ia ka jingsngew shaniah jong ki nongtrei Sorkar ha ki jingai jingshakri ka SBI.
Kane ka SGSP bala pynthymmai ka wanrah ruh ia katto katne ki jingdonkam bala nang pynbun, kynthup ka jingwanrah ia ka Rhodium Salary package, ka personal accident insurance ba kot haduh T. 1 klur, ka air accident insurance ba kot haduh T.1.60 klur, group term life insurance, ka jingpynduna haka bai pynleh ia ki ram shimet, ram shna iing, pule puthi bad thied kali, RuPay, Visa bad Mastercard debit card, YONO SBI bad kiwei ki jingshakri digital, ka jingphah pisa online ba khlem jingsiew, ki jingmyntoi ban ioh ki bahiing hasem hapoh ka SBI Rishtey.
U Myntri Rangbah ula iaroh ia ka jingsynniang kaba khraw jong ka SBI sha ka jingai bynta lang ha ka kam pisa tyngka ha Meghalaya lyngba ki shnat treikam, ki ATM, ki Custoer Service Point bad ka jingkyrshan ha kaban pyntreikam ia ki skhim bapher bapher ka Sorkar ha kylleng ka Jylla.
 bala pynthymmai hapdeng ka Sorkar Jylla bad ka State Bank of India (SBI) ban pynkhlain ia ka State Government Salary Package (SGSP) ne ka song tulop ka Sorkar Jylla.){kind=link}