Shillong, Naitung 17: Ka Meghalaya kala ioh ia ka rekod ha ka jingkiew kaba heh tam kaba kot 95% hadien ka Ministry of Skill Development and Entrepreneurship kala pyntreikam ia ka Special Intervention for Promotion of Apprenticeship in the North-Eastern Region hapoh jong ka PM-NAPS na ka bynta ka snem 2026-27.
Kane ka prokram, ka ban pyntreikam da ka IIE Guwahati ha ka jinglut jingsep kaban kot T.57.58 Klur, ka thmu ban pyniar ia ka prokram ai jinghikai pyntbit ban ieng ha la ki jong ki kjat ha kylleng ki 8 tylli ki jylla jong ka thain shatei lammihngi bad ban pynkhlain ia ka jingiohkam iohjam ki samla hapoh jong ka Skill India.
Ka jingbuh thong na ka bynta une u snem kadei kaba lah pynkiew kumba 15% ban ai jinghikai pyntbit ia ki 30,000 ngut.
Na kitei, 15,000 ngut yn buh ba kin leit trei ha ki tnad jong ka Sorkar Pdeng bad ki PSU kiba don shabar jong ka thaiñ, katba ia ki 15000 yn sa pyndonkam hapoh jong ka thaiñ shatei lammihngi kaban kynthup ruh hapoh jong ki jylla jongki.
Kan don ruh ka jingai ia ka T.1,500 ha ka shi bnai kum ka jingkyrshan na ka PM-NAPS. Mynshwa la pynleit jingmut ba ki samla kiba la ioh jinghikai pyntbit kin hap ban mih ban leit trei shabar, hynrei mynta yn ialeh ha kaban pyndonkam noh ia ki hapoh jong ki jylla jong ki hi.
Kane ka sienjam kan bteng ban kyrshan ia ki workshop, awareness campaign, jingpyniadonbynta bad ki nongaikam bad ka jingiatreilang bad ki jaka treikam bad ki karkhana ban pynkhlain ia ka sawdong sawkun kiba ioh jinghikai pyntbit.
Ia kane ka projek la sdang pyntreikam ha u bnai Jymmang 2025, ha kaba kila don 23,470 ngut kiba la ioh jinghikai pyntbit bad la ioh ban pyndonkam na ka jingbuh thong ia ki 26,000 ngut bad ka jingseisoh kala kynjoh ia palat 90%. Ka jingdon baroh kiba ioh jinghikai pyntbit ha ka thain shatei lammihngi kala kiew na ka 51%, kata na ka 15,562 ngut ha u snem mang tyngka 2024-25 sha ka 23,470 ngut ha u snem mang tyngka 2025-26.
Na kitei, 13,673 ngut kiba ioh jinghikai pyntbit kila ioh ia ka lad ban leit trei shabar ka jylla jongki, katba ia ki 9,797 ngut pat la pyndonkam hi hapoh jong kane ka thain. Ka jingiashimbynta ki kynthei bad ka jingpyndonbynta lang bad ki nongaikam kala kiew arshah da ka jingiashimbynta lang jong ki tnad sorkar.
U Myntri Khynnah ka Sorkar Pdeng u Jayant Chaudhary ula ong, ba kane ka jingpyniar kan plie lad ia ka jinghikai pyntbit kaba paka bad ban iarap ia ki samla ka thaiñ shatei lammihngi ban ioh ia ki jaka ban trei hapoh ka jylla bad ha kylleng jong ka ri.
“Ka thaiñ shatei lammihngi kadei kawei na ki jingkhlain jong ka ri, ha kaba ki samla kiba tbit bad ka jingdon ki paid kiba don ia ka jingangnud kiba long kiba kloi ban noh synniang sha ka jingroi jong ka ri. Ka jingjop jong kane ka sienjam ka pyni da ki kabu kiba dei bad ki jingkyrshan, ki samla jong ngi ki lah ban kiew shaphrang” ula ong.
Da kaba pyniar ia kane ka sienjam hapoh jong ka PM-NAPS, ngi lah pyniar ia ka jingai jinghikai pyntbit kaba paka, ban pynkhlain ia ka sawdong sawkun jong ka thaiñ, ban pynshlur ban iashimbynta ha ki kam karkhana bad ban plie lad ia ki samla ka thaiñ ban ioh ia ki jingtbit bad jingshemphang ha ka rukom treikam hapoh ka thaiñ bad ha kylleng jong ka ri.
